MNF sorkar hi manifesto aṭanga teh chuan Duhthusama kalah mi ṭhenkhatin an hmu - Lalruatkima

MNF chuan nimin khan Mizo Hnam Rûnah inkhawm an buatsaih a; thu sawitu MNF adviser Lalruatkima, minister of state chuan, "MNF chuan kan manifesto point 59 tihlawhtling turin theihtawp kan chhuah. MNF sorkar hi manifesto aṭanga teh chuan duhthusamin in a kal tih hi mi ṭhekhat min hmuh dan a ni," a ti.

Lalruatkima chuan, kum 2017 velah chuan sorkarin zu a zuar a, hmeithai leh fahrah an pung nasa nia sawiin, "Kohhran, páwl ho leh mipui kan mangang a, kan ṭawngṭai a nih kha. Tunah pawh hian sum harsatna phuhru turin zu zuar mai turin thurâwn kan dawng nasa," a ti a; MNF sorkar chuan zu zawrh vanga intodelh ai chuan, mi tam tak ṭahna thlentu zu khap zel a duh zawk thu a sawi.

Sorkar hmasaah zirlaite'n Zophaia chawlhbûk sak an tumnaah Assam police-te'n an kap tih sawiin MNF Adviser chuan, "Kan police station-ah an tlan lut chung pawhin chhan ngamtu an nei lo. MNF sorkar hnuah chuan ralthuam famkim nen lo thawk mah se, ni tlak hmain kan ram kan la lêt leh thei a ni. Huaisen a huna kan huaisen ngamna chhan chu ram neitu kan ni tlat," a ti.

Lalruatkima chuan Congress leh ZPM chungchang sawiin, "Congress chu tuikhura tuihna kang chat tawh ang an ni a, sunhlu kûng angin han kháwng ila, an ṭìl ur ur mai. ZPM hi chu Ashoka Pillar ang deuhin Pu Sapdanga pawl, Pu Duhoma pawl leh Pu Hlana hote chu office pakhatah inhnungchhawn vekin an ṭhu a ni," a ti a, ZPM chu an chhungah lamṭang insiamin an inhruipawh nasa niin a sawi.

MNF Adviser chuan, MNF sorkarin chung lam malsawmna a dawng nia sawiin, "Ei leh barah kan hnianghnâr hle. SEDP pawh keini aiin opposition lamin an nghakhlel zawk," a ti.