Ram roreltute an ṭhat loh chuan Mipui an rûm ṭhin - Lalsawta

Mizoram Pradesh Congress Committee (MPCC) chuan nimin khan Republic Vengah Workers' Meet an hmang a; MPCC vice president Lalsawta'n thu sawiin, ram roreltute an ṭhat loh chuan mipui an rûm ṭhin niin a sawi.

Lalsawta chuan, sorkar ṭhaah chuan thil ṭha tih a awlsam a, thil sual tih a harsa ṭhin nia sawiin, "Sorkar ṭhaah chuan mipui an himin an hlim tlang a, ram roreltute an ṭhat loh chuan mipui an mangangin an rûm ṭhin. Mizoram mipui tana thawk a, an tana belhfâkawm sorkar ṭha siam kan tum. Ṭhat loh theih lohna báwm kan siam dawn a ni," a ti.

MPCC Vice President chuan, an party chuan sum an nei ve lo nia sawiin, "Pawisa avanga vote thlak ai chuan pawisa chakna tel loin sorkar ṭha i siam zawk ang u. Mihring pawisaa lei theih chu sal leh nawhchizuarte an ni," a ti a, anmahni lei tumtute hnâwl turin mipui a chah.

MPCC president Lal Thanhawla chu a nihna aṭanga a chawlh dawn thu sawiin Lalsawta chuan, "Kan pu nen hi chuan tuma'n min khaikhin suh u, a né pawh ka ek lo a, kan tluk ngai dawn lo. Mahse, nangni ho nen hian sorkar ṭha siam i tum leh ang u," a ti.

Congress ṭhalai president Dr Lalmalsawma Nghaka pawhin thu sawiin, MNF sorkarin SEDP an sem dawn thu an sawi tih a sawi a, "An sem a nih pawhin leibá hnutchhiah chiam kher loin ruahmanna siam rawh se," a ti a; sorkarin healthcare scheme-a mipui pawisa a bat pawh an la pek hleih theih loh thu a sawi.

Dr Lalmalsawma chuan, ZPM-ah mipuiin beiseina nei viau dawn ṭhin mah se, an inpuiah ngêt a awm avang leh inlungrual lohna a len thu sawiin, "Inpui berah foundation sawi nghîn mek a nih avangin sorkarna la tur chuan beiseina a bo a ni," a ti.