Serchhip district-ah ruai ṭheh loh an rêl

Serchhip District Disaster Management Authority chu nimin khan an chairman Kumar Abhishek, bawrhsap hoin DC meeting hall-ah an ṭhukhawm a; Krismas leh kum thar hunpui thleng turah Covid-19 a darh lohna turin chak taka hmalak rélin, Krismas leh kum thar lawmna ruai ṭheh loh turin thutlukna an siam.

Ṭhutkhawmah hian pui­punna leh khawhar ina zaiho chungchang chu sawi a ni a, zai chu hripui inkai darhna awlsam a nih avangin a theih hram chuan zaiho rih loh ni se, an ti. Kohhran ṭhenkhat ruai ṭheh tum awm chungchang pawh sawi a ni a, Health department thuràwn angin ṭheh rih loh ni se, an ti bawk.

Kumar Abhishek chuan, tun hnaiah an district chu hripui kai tamna leh dinhmun ṭha lo taka awm mek a nih thu sawiin, "Mizorama hripui kai enkawl lai tam lamah district hrang hrang zingah pahnihna kan ni mek a, nasa taka ṭan lak a ṭul. Hunpui lo thleng tur mipuite'n thlamuang taka an hman theih nan hripui dinhmunin sàn lam pan zel mah se, inkharkhip puan a remchang lo a, chuvangin, khauh takin dan leh thupek kenkawh a pawimawh dawn," a ti.

Serchhip district-ah chawlh­kar khat chhunga hripui vei tam zualna bikte chu uluk lehzuala thlithlai tur a nih thu sawiin bawrhsap chuan, sample endik rûnpui neih a ngai a nih chuan, a rang lama hma la turin Health department-a thawktute a ngen.

Serchhip DC chuan, Covid­-­19 vanga thihna thlir lêtin, vaccine la kim tawhte'n an tawrh dan a nêp bik tih chiang taka hmuh theih a nih thu sawiin, "Vaccine lak hi mi tinin kan ngaih pawimawh thar leh a ngai," a ti a; ṭhutkhawma tel tlawmngai pawl aiawhte chu vaccine lak a pawimawhna nasa lehzuala puanzar kawnga thawhhopuiah a sáwm.

Ṭhutkhawma tarlan danin, Serchhip district-ah hian Covid-19 vei mi 5,609 hmuh chhuah tawh a ni a, mi 5,255 chu dam tawhin, hripui vei hmuh zat aṭangin 93.7% a ni. Hripui vei enkawl lai mi 337 awmin, an zinga 125 chu kum 18 hnuai lam an ni.

Serchhip district-ah Covid-19 vei mi 17 an thi tawh a, hripui vei hmuh tawh aṭangin 0.3% a ni. District chhunga hripui vei thi tawh zinga mi 13 chu Covid-19 vaccine la lo an ni a, vaccine la kim tawh mi pali an awm bawk.