Covid thi mi 357 rál tawh
Covid-19 vangin nimin zing dar 7 thleng khan Mizoramah mi 522 an thi tawh a, Covid-19 vanga thite ràlna (ex-gratia) Rs 50,000 chu mitthi chhungte aṭanga dilna 392 lut tawh zinga mi 357 hnenah pek a ni tawh.
Local/ village task force mi leh sa, Covid-19 kaihhnawiha an chêt chhuahna aṭanga Covid-19 kaia thi zuite hnena sorkarin ràlna Rs 20,00,000 a pek tur Ex-Gratia Lumpsum Compensation Scheme dilna panga a lut tawh bawk.
Covid-19 vanga thite hnena zangnadawmna (ex-gratia) chu State Disaster Relief Fund (SDRF) aṭangin mi pakhatah Rs 50,000 zel pek tur a ni a, nimin thlenga mi 357 hnena pek tawh niin, a vaiin Rs 1,78,50,000 a ni.
Ex-Gratia Lumpsum Compensation Scheme chu mi pakhatah Rs 20,00,000 zel pek tur a ni a, dilna panga lut tawh zingah pek an la awm lo nia hriat a ni thung.
District hrang hranga district thuneitute chuan Vanglaini palai zawhna chhángin, Covid-19 vanga thite ràlna pe tura dilnate chu uluk taka an endik ṭhin thu an sawi a, "Sorkarin inkaihhruaina a siam anga dilnaa thil tel tur ti kim lote chu siamṭha leh turin kan ti a, eng emaw zat chuan an siamṭhat hnuah an rawn thehlut ṭha leh ṭhin," tiin, mitthi chhungte chu dil tura an ràwn ve ṭhin thu an sawi.
Ex-Gratia Lumpsum Compensation Scheme hnuaia dilna lut pakhat chu an zir chian hnuah sorkar data-a task force member list-ah a tel loh avangin dilna hnâwl a nih thu district thuneitu pakhat chuan a sawi a, "A tirah task force member ni mah se, a hnuah a chàwl leh a ni àwm e. Sorkar data-ah a tel loh avangin an dilna hi kan pawmsak thei lo a ni," a ti.