KHAWTHLIR

Thisen pe
Thingsul Tlangnuam Branch YMA chuan nimin khan an khuaah thisen pek an huaihawt a, Aizawl Civil Hospital tan thisen unit 31 an pe a, petute mipa vek an ni.

Border Area Programme-ah tel
Sorkar laipuia Ministry of Culture hnuaia North East Zone Cultural Centre (NEZCC) leh Assam sorkar chuan nimin aṭang khan Bhairabkunda leh Bhutiachang, Udalguri district, Assam-ah ‘Border Area Programme’ an buatsaih ṭan a, Mizoram aṭangin Mizo Students' Union hnuaia Kulva Cultural Club telin, Cheraw leh Sárlàmkai an entir dawn. He programme hi vawiinah chhunzawm a ni ang.

PMEGP zirho
District Industries Centre, Mamit chuan nimin khan Mamit Chhimveng YMA Hall-ah Prime Minister Employment Generation Programme (PMEGP) Awareness Campaign an buatsaih a, district bawrhsap Dr Lalrozama'n a hmanpui. Inkhawma tarlan danin, PMEGP loan hi kumin bikah ruahman chhin ang chuan a tlem berah mi 51 (DIC-ah 22 leh MKVIB-ah 29) hnena pek chhuah tur a ni a, sorkar ṭanpuina cheng nuai 159.13 sem chhuah tura beisei a ni.

Zu siamna tichhia
Aizawl SP hnuaia police-te chuan nimin khan Rangvamual leh a chhehvela zu siamna hmun an dap a, zu siamna hmun pakua, zu bilh lai zém 22, zu thlawrna bél eng emaw zat, khamir 80 leh meihawl ip paruk an tichhia a ni.

Heroin man
Excise & Narcotics department chuan December 12, Pathianni tlai dar 4:10 khan Sialsuk leh Sailam inkar kawngpuiah heroin gram 504 (hawng 40) leh a neitua puh Evy Lalramhluni (31) d/o Vanlalauva, Thenzawl Venghlun leh Vanlalzapi (40) d/o C Thankima, Thenzawl nia inchhálte chu an man. Hemi kaihhnawihah hian mi pahnih hnen aṭangin Pathianni zan dar 7:30 khan Thenzawl Venghlunah heroin gram 24 (hawng 2) an man leh bawk.

Voter awareness campaign buatsaih
Bairabi Higher Secondary School-ah nimin khan kum 18 tling tharte leh kum 18 tling mai turte tan inthlanna kalphung inzirtirna, Systemic Voters Education & Electoral Participation (SVEEP) hnuaiah Voters Awareness Campaign buatsaih a ni. SVEEP kaltlanga higher secondary school zirlaite hnena ‘Voter Awareness Campaign’ hi December 14 leh 16 hian Bilkhawthlir leh Vairengteah neih chhunzawm tur a ni dawn a ni.

Covid-19 vangin mi 521 thi tawh
Nimin khan tlai dar 5 thlengin Covid-19 vanga thi an awm lo a, December 12, Pathianni zana thi tarlan thar mi pakhat a awm. Nimin tlai dar 5 thleng khan Mizoramah Covid-19 vangin mi 522 an thi tawh a, December thla chhungin mi 25 an thi tawh. Pathianni zan dar 7:15 khan Zomawii (77), Chatlang, Aizawl chu hripui vangin State Refferal Hospital-ah a thi a, natna dang nei tel a ni. Zomawii hi Covid-19 vei a ni tih December 11, Inrinni khan finfiah niin, a tûk December 12, Pathianniah SRH-ah dah luh a ni a, zan lamah a thi a ni.