Kawng siam hna thawktute chawlhtir

Lungsen Area Land Owner Coordination Committee for NH 302 chuan NH-302 kawngpui laih hna thawk mektute chu an hna thawh laite chawlhsan rih turin nimin khan an hriattir.

Hna chawlhsan tura an tih chhan hi - sorkar nen an inremna anga November 2021 chhunga ram neitute bank account-a zangnadawmna sum a luh loh vang a ni a; ram neitute hnenah zangnadawmna pek a nih hma chuan hna thawh chhunzawm an remti dawn lo tih an sawi.

Thu dawn danin, NH-302 thawm ṭhat hna thawh turah hian Lungsen huam chhungah vek hmalak a la ni a, chu chu Lungsen area-a ram neitute leh sorkarin inremna ziak a, zangnadawmna pawh November 2021 chhunga pe vek tura inremna an ziah vang a ni. Inremna zawm loa nimin thlenga zangnadawmna sum ram neitute bank account-a a la luh loh avangin hna thawktute chawl turin an hriattir ta a ni.

Lungsen huam chhunga ram neitute chuan sorkar nen an inrem angin November 2021 thla tìr aṭang khan an ramte chu phal takin an laihtir a, December 1, 2021 khan an ram pass orginal pawh Lungleia Land Revenue & Settlement pisaah an dah luh bakah, an bank account pawh endik tawh a ni.