GAD-in Secretariat chei an sawifiah

General Administra­tion department (GAD) chuan thuchhuah siamin, Secretariat chei chungchang an sawifiah a; Krismas puala chei ni loin, Tourism department-in December 9-10, 2021 chhunga Secretariat compound-a Winter Festival an buatsaih puala chei a nih thu an tarlang.

GAD chuan, Tourism department aṭanga ngenna an hmuh angin Secretariat compound-ah Winter Festival hman an phalsak a, photo booth an siamah Krismas lam hawi an hman thu an tarlang a, "Hei hi mi tam takin thu chiang hre loin Secretariat building-a Christmas decoration emaw tiin, social media-ah thu belhchian dâwl lo an theh darh ta vak a ni. Winter Festival hman chhung atan chauha buatsaih a ni," an ti.

GAD chuan, Secretariat chu Krismas pualin kum tin chei ṭhin a nih thu te, Winter Festival hmain christmas tree dah a nih thu te, Krismas banner ‘Krismas Chibai’ tih tàr tura ruahmanna chu tàr hman a la nih loh thute an tarlang bawk.