Endik tur inhnawh zat hriat theih loh Routine siam sa anga kal theih a ni lo

Zoram Medical College (ZMC) Covid-19 Laboratory-a swab sample endik tura lâk tawh, la endik loh eng emaw zat a awm a, routine siam sa angin endik theih a ni lo. ZMC director Dr T Lalhmangaihi chuan, sample lâk tawh la endik loh (inhnawh khâwm) zat hriat theih a nih loh thu a sawi rualin, chak zawka endik a nih theih nan a remchan angin thawktu hrang hrang dah belh zel a nih thu a sawi.

Vanglaini palai zawhna chhangin ZMC Director chuan, sample lak tawh, la endik loha inhnawh khâwm zat sawi theih a nih loh thu a sawi a, "A zat tak kan hre thei lo; a chhan chu ni tin thermocol box-ah a rawn thleng a, chàr phui tlat a ni a, a chhungah ice box a awm bawk a. Sample pakhat hi layer thumin tuam vek a ni," a ti a; báwma awm zat a inan vek loh thu a sawi a ni.

Dr T Lalhmangaihi chuan, district hrang hrang aṭanga sample an dawnte endik dan tura ruahmanna (routine) an siam ang takin endik theih a nih loh thu sawiin, "Routine angin a kal theih loh. Symptomatic ho hi kan ngai pawimawh hmasa lo thei lo. Vawiin (Thawhlehni)-ah pawh a upat dan indawtin Lawngtlai leh Saiha kan ti tho ang a, Lungleite nen. Tichuan, priority (hmanhmawhthlak bik)-te kan ti bawk ang," a ti.

ZMC Director chuan, tun hnaia a thusawia sample endik tawh chin a sawiah, June 10 thlenga dawnte an endik tawh angin a sawi nã a, June 10 aia hmaa dawn tawh endik lohte pawh a lo la awm thu a sawi.

Swab sample pakhat chu thuah (layer) thuma tuam vek a nih thu sawiin T Lalhmangaihi chuan, "Hawn tawp tawp a, freezer-ah dah tawp theih a ni lo a, an ID nen, an hming nen, engkim chhinchhiah thlap a ngai a, fimkhur a ngai lutuk. Heng hian a test tak aiin hun a duh rei zawk," a ti a; thawktute tan pawh fimkhur bakah indaih tâwk a ngaih thu sawiin, "Vawiin (Thawhlehni)-ah data entry operator dah nghal ru, kan ti a, 4th grade pawh pahnih dah belh rawh u, kan inti a ni," a ti. 

Dr T Lalhmangaihi chuan, Covid-19 endikna atana sample test chu a tira ICMR guideline ang chuan kal se, endik tur an tam lutuk lo tih a sawi a, "Mahse, mipui demand avangin test vek kan duh a, kan ti ta rum rum si a. Sample collection lamah kan intir chhuak nasa si a, chu'ngte chu kan inko kîr a, theihtawpin kan ṭang," a ti a; sample lo dawngsawnga endiktute pawh a lêta an indah belh thu a sawi.

ZMC-a swab sample buaipuitute leh endiktute an hah tak zet thu sawiin Dr T Lalhmangaihi chuan, "Tihsual a hlauhawm lutuk. Khawlah a indawt tê têin (step by step) uluk taka barh a ngai a, a hautak tawp a ni. A endiktute hi zing dar 9-10 aṭanga zan dar 2-3 hi chu an thleng ngei ngei. Endik bik lai thawk zo ringawt mah se, report siam a ngai a, a inmil em tihte en uluk a ngai hle. Tawn ngai loh thil a ni a, inhriatthiam tlàn a ngai khawp mai. Thawktute hi physical tak pawhin an fit ṭhat a ngai hle a ni," a ti.