Aizawl by-pass road tur pawm a ni ; Km. 2.45-a thui lei verh a ngai dawn

Ministry of Road Transport & Highways hnuaia Mizorama national highway siam hna enkawltu NHDCIL chuan Aizawl by-pass road siamna atana ruahmanna chu tun hnai khan a pawm. Aizawl by-pass road siam turah hian km. 2.45-a thui lei verh a ngai dawn.

Vanglaini palai zawhna chhangin adviser to chief minister (technical) K Lalsawmvela chuan, Aizawl by-pass road atan consultant-te'n duh thlan tur chi li an siam thu a sawi a, "Chief Minister hoa endika sawiho a nih hnuah endik turin rawtna Delhi-ah thawn a ni a, NHDCIL thuneitu sang Executive Committee chuan November 26, 2021 khan a pawm a ni," a ti.

K Lalsawmvela sawi danin, NHDCIL chuan consultant-te hnenah December 8, 2021 khan kawng kalna tur (alignment) an ruahman chu pawm a nih thu leh detailed project report (DPR) siam nghal tura hriattirna lehkha an pe a ni.

Aizawl by-pass road hi Silchar aṭanga four lane tàwpna aṭanga inṭanin, Kurung lui kânin Rangvamual ep pangah a chho ang a, Bawngkawn Brigade Field hnuaia chhoin, chuta ṭang chuan lei verh ṭan tura ruahman a ni.

Lei verh chu Zemabawk-Selesih kawnga Muthi ram velah a chhuak dawn a, chuta ṭang chuan Muthi tlang pangah her liamin, Tuirial Airfield hmàr lamah Tuirial lui a kân dawn a, Seling bul Phaibâwk bul velah kawngpui pangngai a fin ang.

By-pass road inṭanna aṭanga Phaibawk hlat zawng chu km. 28.90-a thui a ni dawn a, tuna NH kawngpui pangngaiah chuan km. 56.40-a hla niin, kawng thar chu km. 27.50-in a hnai zawk dawn.

Lei verh chu kaw hnih (twin tunnel) tura ruahman niin, a sei zawng chu km. 2.45 a ni a, in awmna (built up area) vela lei verh chung chhah lam chu metre 468-491 tura ngaih a ni.

Adviser to CM chuan, by-pass road-in ken tel tur a neih thu sawiin, "Lei verh luhna bul aṭangin Edenthar Veng lamah double lane kawng sial phei a ni ang. Hei bakah hian a chhuahna Muthi ram lam aṭangin Aizawla by-pass road chhuahna tur, Zemabawka mandir bula chhuak tur chu double lane-a siam a ni ang," a ti.

K Lalsawmvela chuan, NHDCIL-in thla hnih/ thum chhunga DPR peih a, chumi hnua sanction hmu veleh tender chhuah a, hna ṭan nghal an tum thu sawiin, "Hei hi zawh a nih hunah chuan Aizawl khawpui motor tâwt hi a tiziaawm fé tura rin a ni," a ti a, Mizoram tan thil ropui leh lawmawm tak a nih thu a sawi.

Kawng siam thar turah zangnadawmna a ngaih nual dawn thu sawiin K Lalsawmvela chuan, "DPR han peih se, zangnadawmna ngai tur zat a hriat ang. Kawng sial tur hi a thar hlaka sial tur a ni a, kawng awm sa pakhat mah a paltlang dawn lo. Chuvangin, hnathawh vanga mipui harsatna thleng tur a awm dawn lo a ni," a ti.