MP K Vanlalvena'n Parliament-ah Ráltlân chungchang a sawi

Rajya Sabha MP K Vanlalvena chuan Par­liament thlasik ṭhut­khawm neih mekah nimin khan thu a sawi a, Mizoramin Myanmar ráltlânte a ṭanpui dan a sawi.

K Vanlalvena chuan, Myanmar sipaite'n mipui thuneihna an chhuhsak avangin Mizoramah ráltlân 1,5000 vel an awm thu sawiin, "Ráltlânte hi Mizoram hmun hrang hrangah awm darhin, ṭhenkhat chu an chhung­khat laináte hnen­ah an chêng a, a tam zawk chu Mizoram sorkar leh tlawm­ngai pawlte'n khua 15 vela refugee camp an sakah an awm mek a ni," a ti.

Myanmar ráltlânte chu Mizoram sorkar, tlawm­ngai pawl, koh­hran, political party leh mi tinte'n hmangaih takin an chhawmdawl tih sawiin K Vanlalvena chuan, "An mamawh chi hrang hrang - chaw, tui, damdawi, silhfèn, chenna in leh naupang sikul kalna thlengin sorkar laipui ṭanpuina tel loin Covid-19 leng karah kan pe a ni," a ti a; India ram chu ráltlânte ṭanpui tura intiamkam ram ni ve lo mah se, khawvela democracy ram lian ber a nih avangin a ṭhenawm rama democracy duhtute ṭanpui chu a tih tur a nih thu a sawi bawk.