KHAWTHLIR

Thisen pe
Blessino Nursing School chuan nimin khan an hmunah thisen pek huaihawtin, Aizawl Civil Hospital tan thisen unit 39 an pe a, petute mipa 29 leh hmeichhia 10 an ni. Kolasib Officers' Club pawhin Krismas pualin nimin khan District Hospital blood bank-ah thisen unit 13 an pe a, petute mipa 10 leh hmeichhia pathum an ni.

Dy Speaker-in hawng
Assembly deputy speaker Lalrinawma chuan nimin khan North Vanlaiphai Games & Sports Association-in an khuaa Rahsi Veng Volleyball Court-a David Lalrintluanga Memorial Volleyball Tournament an buatsaih a hawng. Tournament-ah hian khaw hrang hrang aṭangin team 26 an tel a ni.

Board exam hun
Mizoram Board of School Education chuan HSLC leh HSSLC Examination 2022 routine a tichhuak. HSLC exam hi February 28 aṭanga March 16 thleng neih a ni ang a, March 17-23 chhungin practical exam neih a ni ang. HSSLC exam chu March 1-25, 2022 chhungin neih a ni ang a, a, February 14-ah practical exam neih a ni ang.

Khawzawlah curfew
Khawzawl bawrhsap CC Lalchhuangkima chuan nimin khan Khawzawlah zan dar 8 leh zing dar 4 inkarah páwn chhuah khapna (curfew) a puang. Curfew hi Khawzawl district mipuite Covid-19 laka an him theihna atana puan a nih thu a tarlang.

Roll ennawn thlirho
Special Summary of Photo Electoral Roll 2022 kalpui meka Election Commission of India (ECI)-in Champhai district endik tura a ruat electoral roll observer (ERO) Dr Lalzirmawia Chhangte chuan nimin khan Champhai DC conference hall-ah district thuneitute nen electoral roll ennawn dan an thlirho.Inkawmhonaa tarlan danin, December 13, 2021 thleng khan vote nei thar leh assembly constituency dang aṭanga luh dilna 2,418 chinfel a ni tawh a, online EROnet-ah 2,044 dah luh a ni tawh. Roll aṭanga paih dilna 473 leh bial dang aṭanga paih dilna lut 241 chinfel a ni tawh a, siamṭhat dilna 357 pawh chinfel nghal niin, EROnet-ah 315 dah luh tawh a ni.