Sorkar ṭawiâwm an ngai - Hawla

Mizoram Pradesh Cong­ress Committee (MPCC) president Lal Thanhawla chuan, Covid-19 hripui chu khawvel leh Mizoramin an la tawn ngai loh thil a nih avangin sorkar ṭawiawm ṭhat a ngaih thu a sawi.

Nimina AMC Ward-V Councillor-in a bialte hnena ambulance hlanna inkhawm a buatsaih a hmanpuinaah thu sawiin Lal Thanhawla chuan, "Sorkar dem duh tan chuan demna tur chu a awm ang. Covid-19 hi kan la tawn ngai loh thil a ni a, sorkar tan pawh inpuahchah a harsa ang. Chuvangin, sorkar kan ṭawiawm a ngai a ni," a ti.

Chief minister hlui Lal Thanhawla chuan, mi ṭha­hnemngaite mahni in leh lo kalsanin ramhnuaiah an duty tih sawiin, "Chu'ng hah taka duty-te tan chuan mi ṭhahnemngaite an luang chhuak a ni," a ti a; Covid-19 dona atana mi hrang hrangte inpekna chu lawmawm a tih thu a sawi.

Politics chu mi tam takin mahni inhaivûrna tur emaw an tih thu sawiin Lal Thanhawla chuan, "Politics hi Pathian rawngbawlna a ni. NLUP khan sorkar hnathawk leh mi hausate a zawng lo a, mahni kutkawiha ding chhuak thei lo mi harsate a zawng a ni. Kan hlawhtling hle a, kum thum chhung phei chu GSDP sang ber state-ah kan tel reng a ni," a ti.