India khua leh tui nihna thlauhthla nuai 8.5 chuang awm

Kum 2017 aṭanga kumin September 30 thleng khan mi nuai 8.5-te chuan India khua leh tui an nihna an thlauhthla tih sorkar laipui chuan a sawi.

Hemi chungchang hi sorkar laipui chuan union ministry of home affairs data behchhanin nimin khan Lok Sabha a hrilh a ni.

Kumin bikah September 20 thleng khan mi 1,11,287-te chuan India khua leh tui an nihna an thlauhthla tih union minister of state for home affairs Nityanand Rai chuan a sawi. Hetihlai hian kum 2016-2020 inkar khan ramdang mi 10,645, an zinga tam zawk Pakistan (7,782) leh Afghanistan (795)-te chuan India khua leh tui nihna pe turin an dil thung. Ram pawn lama India mi khawsa hi nuai 100 chuang an awm mek bawk.

Sorkar laipui chuan Afghanistan, Bangladesh leh Pakistan aṭanga December 31, 2014 hma lama India ram rawn lut, Hindu, Sikh, Buddhist, Jain, Parsis leh Kristiante hnena India khua leh tui pek theihna tur, Citizenship (Amendment) Act (CAA) chu sawiselna nasa tak karah a lo pass tawh a, BJP kaihhruai sorkar laipui chuan CAA rules siam tur hian nakkum January thla thleng hun pekbelh alo dil tawh a ni.