Secondary School Games ṭan a ni

Lunglei Ṭhuamluaia Mualah nimin khan Mizoram Secondary School Games 2021 vawi 38-na ṭan a ni a, Lunglei district High Powered Committee (HPC) vice chairman Lawmawma Tochhawng, MLA-in a hawng. Secondary School Games hian December 16, 2021 thleng a awh ang.

Lawmawma To­chhawng chuan, School Games chuan zirlai leh zirtirtuteah rah ṭha a chhuah a beisei thu sawiin, "India sorkarin sport hi zirlaite subject pakhatah a dah a, Mizoram sorkar pawhin sport theite tan hamṭhatna a siamsak ṭhin. Zirna leh sport hi kal kawp tlat a ni a, uar bik nei loa hman thiam a ngai," a ti a; district hrang hrang aṭanga School Games-a telte chu ṭangkai taka hmang ṭheuh turin duhsakna a hlân.

Secondary School Games hi Covid-19 léng avangin kum 2020 khan neih a ni lo a, kuminah Lungleiah nghah niin, district 11 aṭangin infiammi leh official mi 330 an tel. Covid-19 avangin infiamna chi li - athletics, judo, badminton leh table tennis-ah chiah inelna buatsaih a ni.