Health Minister leh Zodintluanga ten Lungleia RT-PCR dah dan tur an sawi

Congress Legislature Party (CLP) leader Zodintluanga chuan nimin khan Health minister Dr R Lalthangliana a pisaah a hmu a, Lung­lei leh Mizoram chhim lam tana Covid-19 vei leh vei loh endikna RT-PCR kháwl lei dan tura hmalakna chungchang a sawipui.

Thorang bialtu MLA Zodintluanga hian June 13, Inrinni khan Lunglei DC, SP leh Lunglei Civil Hospital (LCH)-a thawkte a kawmnaah, Lunglei Civil Hospital laboratory-a dah turin RT-PCR khawl lei a duh thu, sorkarin a remtih chuan pek a duh thu a sawi a; LCH laboratory-a RT-PCR dah a nih theih dan tur a sawipui a ni.

Hetih lai hian, Mizoram sorkar chuan LCH laboratory-a RT-PCR dah a nih theih dan enfiah turin June 15, Thawhṭanni khan Aizawl aṭangin mithiam pathum a tír a; chu'ng mi pathumte chuan LCH-ah RT-PCR dah theih a nih leh nih loh an enfiah. Mithiam­te chuan an report siam chu nimin khan Health Minister-ah an thehlut nghal.

Mizoram sorkarin Lungleia RT-PCR dah tura hma a lâk leh tâk avangin Zodintluanga chuan a hmaa RT-PCR khawl pek a inhuam thu a lo puan tawh chungchangah sorkar ngaihchan rih a ngaih dawn leh dawn lohah Health Minister a ráwn a; sorkarin rang taka hma a lâk leh tâk avangin sorkar thu a lo ngaihchan rih tur thu Health Minister a hrilh a ni.

Dr R Lalthangliana chuan, Zodintluanga chu a MLA fund aṭangin Lunglei mamawh em em ambulance a pek avangin lawmthu a hrilh a; RT-PCR pek tuma hma a lakna chung­changah, "A lawmawm ka tiin ngaihtuahna nasa tak min neihtir a ni," a ti. Chutih rualin, Lungleiah RT-PCR dah theih a ni em tih a la hriat loh thu leh, kháwl pakhat an chah mek chu Lunglei tan 'earmarked' a nih theih tur thu a sawi.

Hetih lai hian, Health secretary H Lalengmawia chuan Zodintluanga hnenah, Lunglei tan RT-PCR dah a ṭul thu Health Minister-in a hma aṭangin sawi mah se, a hmain official taka hmalakna a awm loh thu a sawi a, "Hemi kawngah hian a hmain official order a awm lo," a ti.