Setana tactic hmangin politics-ah Pathian ram a din theih loh - K Sapdanga

ZPM Ṭhalai Headquarters-in article inziahsiak an buatsaihah nimin khan ZPM pisaah result puan leh lawmman semna leh AMC councillor-te lawmpuina hun an hmang. ZPM working president K Sapdanga'n thu sawiin, "Setana tactic hmangin politics-ah Pathian ram a din theih loh," a ti.

K Sapdanga chuan, setana tactic hmangin politics-ah Pathian ram a din theih loh tih sawiin, "Vote kan zawn dan hi Pathian thu nen a inmil tur a ni," a ti a; ZPM-ah kalphung thar chu member an nih phat aṭanga hman tur a nih thu leh ZPM ṭhalaite chu an party hmél lanna a nih thu a sawi.

ZPM chu hman ní lawka ding, ruhrel nei lian lo tak a ni chungin inthlan apiangah ZPM vote-tu ṭhahnem tak an awm zel tih sawiin Sapdanga chuan, "Kan theih vang ni loin, mi rilruah thawk ṭhin a awm vang zawk a ni," a ti a; kalphung thar hrilhfiahna ziak tura tih a nih thu sawiin, "Ngun taka ka ngaituah hnuin, 'Ram rorelnaa Pathian ram tun din' tih hi a ni ta berin ka hria," a ti.

ZPM Working President chuan, ZPM ṭhalaite leh AMC councillor-te fuihna thu a sawinaah, "Pawisa hi tlinna a ni lo. Pawisa hi tlinna ni se, Congress leh MNF-te hi an tla ngai lo ang," a ti bawk.

Inkhawm hi ZPM Ṭhalai vice president H Vanlalhuma'n a kaihruai a, ZPM Ṭhalai president leh AMC councillor Malsawmzuala Ralte pawhin thu a sawi a ni.