College zirtirtute’n inkhawmpui an hmang

Mizoram College Teachers’ Association (MCTA) chuan nimin khan Taxation department auditorium-a Annual General Conference vawi 42-na an hmang a, chief minister Zoramthanga’n a hmanpui.

CM Zoramthanga chuan, ram economy hmasawnna leh zirna chu kal kawp tlat a nih thu sawiin, “Hmasawnna ngêlnghet neia sum thawh chhuah tam zawk awm thei tur chuan mihring thiamna sang zawk, mi hmantlak leh chhawrnahawm tam tak an awm a pawimawh. Chu’ng atan chuan ṭhangtharte kaihruaitu college zirtirtute an pawimawh,” a ti.

Hmasawn turin hmathlir ṭha neih a pawimawh thu sawiin Zoramthanga chuan, “A tlachawpa kal ringawt chuan hlawhtling taka mi kaihhruai a theih loh. Hriselna a pawimawh avangin hriselna kawnga hma sawn tlân theih nan zirna-inah pawh a remchan dan ang zela inhrilhriatna pek ṭhin ni se,” a ti a; college zirtirtute chu mamawh an neih chuan sorkarah thlen tura chahin, a remchan ang zela hma a lakpui tur thu a sawi.

MCTA inkhawmpui hi MCTA vice president CVL Tlanhlua’n a kaihruai a, kum 2019-2021 chhunga an member thi mi 10 sûnna hun an hmang. Kum 2021-2023 chhunga MCTA president atan Lalbiakzuala, vice president atan Dr Samuel J Laltlanzaua, general secretary atan CVL Tlanhlua leh treasurer atan Dr Samuel Vanlalthlanga te an thlang a ni.