Serchhipah zirlai ti ṭhate chawimawi

MZP Headquarters, Serchhip chuan nimin khan Serchhip Hmarveng YMA Hall-ah Serchhipa Mizo zirlai ti ṭhate chawimawina hun an hmang a, bialtu MLA Lalduhoma leh MZP Gen.Hqrs hruaitute’n an hmanpui. HSLC-a distinction-a pass mi 37, HSSLC-a distinction-a pass pathum leh Mizoram puma ti ṭha zinga lang pathum hnenah chawimawina hlan a ni.

Bialtu MLA Lalduhoma chuan, zirlai ti ṭhate’n an nu leh pa, khawtlang leh an awmna bial an chawimawi tih sawiin, “Mizorama lehkhathiam tam berna district kan ni. Kan hnam nunphung Zo nun ze mawite hi kan zir thar leh a, zirlaibuah kan zir thar leh a pawimawh hle. Kan zirlai pawh ennawn a ṭul a, kan ramin a mamawh tur leh zirlaite’n a taka an hman theih tur thiamna tipung thei lam kan zir tam a pawimawh tak zet a ni,” a ti a; zirlaite chu mi tih ang ti thei nih tum turin a fuih.

Lalduhoma chuan, sorkar anga hmalak ngam lohnaah MZP-in hma an la ngam tih sawiin, “MZP hi hnam inpumkhatna atan theihtawp chhuahtu an ni a, sorkar leh NGO dang an mutthluk lai pawhin MZP chu a fím kar reng ṭhin. MZP vangin Myanmar lam unaute nen inpawhna ṭha zawk kan nei a, Zo hnahthlak min tipumkhattu atana thawh hlâwk ber an ni,” a ti.