Keifang khelmuala phûl lem phah hawng

Minister R Lalzirliana chuan nimin khan a bial chhung Keifang khaw khelmuala phûl lem phah thar a hawng. Phûl lem phah hna hi Lushai Engineers-in an thawk a, North Eastern Council aṭanga sum hmuh nuai 538.81 sênga siam a ni.

R Lalzirliana chuan, term nga chhung Saitual/Ṭawi bialah MLA atan thlan a ni tawh tih sawiin, “Pathian malsawmna ka dawn vang leh bial mipui duhsakna ka dawn vang a ni. Party hotuteah rinna nghat tur ni mah se, Pathian hi min ṭanpuitu ber a ni tih hriat a pawimawh,” a ti.

Sports minister Robert Romawia Royte pawhin thu sawiin, Keifang khelmuala phûl lem phah chu khua/veng bil ta a ni lo tih a sawi a, “District mipui a tam thei ang berin hmang ṭangkai se tih hi kan duh dan a ni,” a ti a; Keifang khelmual behchhanin Saitual district tan Tata Trust Football Academy dah tum a nih thu a sawi.