Police thil tih danah MPYCC lungawi lo

December 13, Thawhṭanni zan dar 8 vel khan minister of state Robert Romawia Royte private secretary (PS) H Zothansanga, Chhinga Vengin Mizoram police-a Cyber Crime Branch-ah FIR a thehluh avangin CT Lalthansanga, Khatla East man a ni a; hei vang hian Congress ṭhalaite chu Thawhṭanni zan khan zanlai pelh thlengin Cyber Crime Branch pisaah an pungkhawm.

MPYCC tarlan danin, CT Lalthansanga hi MPYCC-a joint secretary a ni a, Facebook-a a account CT Sangtea hmanga Zoram Politics Group 1-a a thil post avangin a lakah H Zothansanga'n FIR a thehlut a ni. Police-te chuan CT Lalthansanga chu Khatla East-a an in aṭanga man nghalin, Aizawl Police Station-ah hrèn a ni a; a lakah IPC Section 500/505(2) hmangin thubuai ziah luh a ni.

CT Lalthansanga man a nih avang hian Congress party hruaitute leh Congress ṭhalaite chu lungawi loin Cyber Crime Branch leh Aizawl PS-ah an kal khawm a, Thawhlehni zing lam thlengin an awm a ni.

MPYCC chuan, "CT Sangtea hian dik lo taka puh a nih leh rikrum taka an ina kal chilha man a nih avangin nizan (Thawhlehni zan) khan FIR a thehlut ve nghal a ni," an ti a; H Zothansanga lakah IPC 506/505(2) hmang vekin Cyber Crime Branch chuan 14/12/2021 zing dar 1:29 khan case number general register 25/21-ah a ziak lut tih an tarlang.

MPYCC-te chuan CT Lalthansanga police-in an man nghal angin H Zothansanga pawh man nghal an phût a, "CT Sangtea leh H Zothansanga chunga hmalak dan hi a lài loh êm avangin pungkhawmte hi an lungawi lo hle a ni," an ti.

He thil thleng chungchangah hian Mizoram Pradesh Congress Committee (MPCC) chuan thuchhuah siamin, MNF sorkar chu mahni pawi khawih thupna atana mi dang chunga hleilen hmangah an puh.

MPCC chuan, MNF sorkar hnuah thil ho tê têah FIR thehluh a hluar nia sawiin, "Mi hniam zawk leh thil ti thei ve lote vau leh rîkrâp zawnga lalna leh thuneihna hmang sual a, communist ram leh dictator lalna ram ang maia FIR thehluh a awm ta fo mai hi thil ṭul lo leh ho mai maia police-te buaina siamsakna leh anmahni thlang tlingtu mipui dikna palzûtnaah kan ngai," an ti.

H Zothansanga'n CT Lalthansanga laka FIR a thehluh chu December 10, 2021 tlai dar 5-6 inkara minister Robert Romawia Royte naute Teirei lei vengtu Vanramsanga, Saikhawthlir chunga an chêt dan mawi lo social media-a darh thupna leh boruak dang siam tumnaa an ngaih thu MPCC chuan an tarlang a, "In zahlohna leh mihring inpawisak lohnaah kan ngai," an ti bawk.