BJP President-in central-a a thlente a sawi

BJP, Mizoram Pradesh president Vanlalhmuaka chuan nimin khan an pisaah thuthar thehdarhtute a kâwm a, tun hnaia Delhi-a zinaah sorkar laipui hotu hrang hrangte hnena Mizoram mamawh a thlente a tarlang.

Vanlalhmuaka chuan, prime minister Narendra Modi bakah minister 12 a hmuh thu sawiin, “Minister dangte pawhin appointment min pe tho chungin, appointment inrual a awm avangin minister 4/5 chu ka hmu hman ta lo. Minister-te ka hmuh rual hial kan state tana ṭul ka tih avangin ministry hrang hranga secretary, joint secretary leh director-te a tul angin ka hmu nual a ni,” a ti.

Delhi-ah thil tam tak a hriat belh tih sawiin Vanlalhmuaka chuan, “Mizoram sorkar min hmuh dan pawh ka hriat phah,” a ti a; kum 2023-a BJP an sorkar huna Mizoram mipui rawng an bàwl dan tura kawng sial lâwkna atan a ṭangkai hle dawna a hriat thu a sawi.