Covid-19 vei enkawl lai Mi 2,444 (1.76%) an awm
December 13, Thawhṭanni khan Mizoramah Covid-19 vei mi 320 hmuh chhuah a ni. Nimin khan hripui vei dam tawh mi 412 chhuahtir an ni a, mi pahnih an thi. Nimin tlai dar 5 dinhmun angin, Covid-19 vei enkawl lai mi 2,444 (1.76%) an awm.
Covid-19 vei Thawhṭannia hmuh thar mi 320-te chu mipa 140 leh hmeichhia 180 an ni a; ZMC laboratory-a hmuh chhuah 41, TrueNAT hmanga hmuh 26, RAT hmanga hmuh 248 leh Fluorescent Immunoassay (FIA) hmanga hmuh panga an ni.
IDSP record angin, Mizoramah Covid-19 vei 1,38,613 hmuh chhuah a ni tawh a, mipa 66,890 leh hmeichhia 71,723 an ni a, mipa aiin hmeichhia 4,833-in an tam zawk. Nimin tlai dar 5 thleng khan mi 1,35,644 (97.86%) chhuahtir an ni tawh a, mi 525 (0.38%) thi tawhin, enkawl mek mi 2,444 (1.76%) an awm.
December 13, Thawhṭannia Covid-19 vei hmuh thar mi 320 zingah symptom nei mi 154 an awm a, mi 166 erawh chuan symptom an nei lo.
Thawhṭannia swab sample endikah positivity percentage 10% aia a sanna district pali a awm a, positivity rate sanna ber Khawzawl district-ah 26.26% a tling. Positivity rate 10% chung lam district dangte chu Serchhip 13.41%, Champhai 13.01% leh Mamit 12.87% a ni. Kolasib district-ah erawh chuan 0.27% chiah a ni.
Mizorama swab sample endik tawh zawng zawngah RT-PCR hmanga endik zat percentage ni tin a tlahniam hret hret zel a, RAT hmanga endik zat a pung zel thung. December 13, 2021 thlenga swab sample endik tawh 14,69,454 aṭanga RT-PCR hmanga endik zat percentage chu 22.31 a ni a, RAT hmanga endik zat chu 71.80% a tling.
Kum 2011 chhiarpui aṭanga chhûtin, Mizorama Covid-19 vei hmuh tawh 1,38,613 chu mi 1,000 zelah hripui vei mi 126 an awm ang a ni a; mi 1,00,000 zela Covid-19 vangin mi 47 an thi tawh ang a ni tih sorkar thuchhuakin a tarlang.
Nimin khan tlai dar 5 thlengin hripui vei dam tawh mi 412 chhuahtir an ni a; Aizawl district-ah mi 278, Khawzawl district-ah 50, Saitual district-ah 26, Kolasib district-ah 18, Mamit district-ah 17, Lunglei district-ah 12, Champhai district-ah pakua leh Siaha district-ah pahnih an chhuak a ni.