SEDP Board-in minister-te hna a chhâwk zângkhai - Dr Thangtea

Commerce & Industries Development Board vice chairman K Laldawngliana, MLA pisa thar Old Secretariat building-a mi chu nimin khan hawn a ni. Pisa hawngtu Commerce & Industries minister Dr R Lalthangliana chuan, SEDP Board-in minister-te hna nasa takin a chhâwk zângkhai niin a sawi.

Dr R Lalthangliana chuan, Commerce & Industries department hnuaiah corporation hrang hrang a awm thu sawiin, “MIZOFED chairman hlui Pu Dawngtea, MLA tana SEDP Board vice chairman pisa hawn a ni ta hi a fuhin a lawmawm. Covid-19 vanga hmalakna tam tak a chak thei lo erawh a pawi a, hei vang hian economic revival programme duang chawpin central-ah na taka nawr a ni,” a ti.

Covid-19 avanga harsatna tuartu micro industry (pheikhawk siam, hawker, etc.)-te chhanchhuahna turin district hrang hrangah mi 50,000 vel tan ṭanpuina tur project ûm zui mek a nih thu sawiin Minister chuan, “Cheng vbc. 250 hû project siamin central sorkar hotute dawr a ni,” a ti a; project chu a hlawhtling a nih chuan economic revival programme ṭha tak a nih dawn thu a sawi.

K Laldawngliana pawhin thu sawiin, hnathawh hmabak inchhawpte chu full time-a thawh a tum thu a sawi a, “Kan hotute’n tih tur an tih apiang bawhzui zel turin ka inpe a ni,” a ti.