Chhawmdawlna pek ve an nih loh chuan Mizorama Bru-te'n lak letna boycott tum

Tripura relief camp aṭanga Mizorama rawn lêt tawh Bru intél khawmte chuan tun hnai khan Equal Package Demand Committee (EPDC) an din a; EPDC hian August 16, 2018 aṭanga relief camp aṭanga Bru hruai kîr turte dawn ang dawn ve phûtin, an dawng ve lo a nih chuan hruai kîr hna boycott an tum.

Mizoram khaw hrang hranga Bru-te aiawh tuna hnaia Mamita IPR Conference Hall-a inhmu khawm chuan EPDC an din a; inhmuh khawmnaah hian mi 102 an tel a, chairman atan Elvis Chorkhy an thlang. EPDC hian, Bru hruai kîr hna thawh a nih hmaa Mizorama Bru kîr tawh chhungkaw 1,712-te hnena Bru hruai kîr leh turte dawn ang dawn ve an phût a ni.

Vanglaini palai zawhna chhangin EPDC chairman Elvis Chorkhy chuan, hruai kîr hna thawh a nih hma ngeiin la hruai kîr leh turte dawn ang pek tura tih a nih loh chuan Bru lak let hna thawh tur chu an boycott dawn thu a sawi a, "Kan duh ang tihhlawhtlin a nih loh chuan kan awmna khuaah lo kir turte an awm kan phal dawn lo. Hetianga ruahmanna kan siam chhan hi, lo kîr turte kan kan huat leh duh loh vang ni loin, sorkar laipui aṭanga kan hmuh tur ang kan hmuh theihna atan a ni," a ti.

EPDC Chairman sawi danin, Mizorama rawn kîr tawh Bru-te hi suma ṭanpuina Rs. 80,000, in hmun leh kum khat chhung a thlawnin ration pek an ni. An thil phûtte chu - Tripura aṭanga lak kîr leh turte dawn ang Rs. 1,50,000 (Rs. 80,000 an dawn tawh avangin Rs. 70,000) te, kum hnih chhung free ration (kum khat an dawn tawh avangin kum dang) leh, kum li hnua lak chhuak theih tur Rs. 4,00,000-te a ni.

Tuna an thil phût chu hmân aṭanga nawr tawh a nih thu sawiin Elvis Chorkhy chuan, "Refugee camp-a Bru hruai kîr hna thawh tura puala din Joint Monitoring Committee-ah ka tel ve a, kan meeting apiangin tuna kan thil phûtte hi ka sawi chhuak ṭhin. Kan thil phûtte hi Union Home Minister hnenah ziakin kan thlen phawt ang a, a ṭul angin kan bawhzui zel ang," a ti.

Thu dawn danin, Tripura relief camp aṭanga Bru hruai kîr turte chu Mamit district-a khaw 48, Kolasib district-a khaw 10-ah leh Lunglei district-a khaw paliah dah tum an ni. A bul ṭan nan district hrang hranga lak let tur, November 2016-a chhinchhiah tawhte chu zawn chhuah a, an awmna tur khua ṭheuhah hruai an ni ang a, chenna in tur sak sa a awm loh avangin an chen lailâwkna tur in sorkarin a saksakah dah phawt an ni ang.

Tripura aṭanga Bru-te lak let dan tur kimchang chu dah an nihna tur district hotute'n an siam fel vek tawh a; Tripura aṭanga Bru hruai kir tura chhinchhiah zat chu chhungkaw 5,413-a mi 32,857 an ni a, puitling 23,280 leh naupang 9,577 an ni.