MR bill-ah cheng nuai 50 chuang paihsak

Mizoram sorkarin sum inrenchemna atana sorkar hnathawkte medical reimbursement (MR) bill dan thar kalpui tura Sub-Committee on Medical Reimbursement a din hnua hmalakna kal zelah, April-June, 2018 chhunga damdawi-ina awmte MR bill endikna aṭangin Mizoram State Health Care Society (MSHCS) chuan Rs. 50,92,401 an paihsak tawh.

MSHCS-in MR bill a endikna atanga sorkar hnathawkte'n MR bill an thehluh zinga cheng nuai 50 chuang an paihsak hi Medical Attendance Rules, 1944 leh Finance department-in hriattirna hrang hrang a chhuah tawh ṭan chhana paih a ni.

MSHCS hotute sawi danin, MSHCS hian July 12, 2018-ah sorkar hnathawkte MR bill dik lo an paihsak zat chu nuai 21 chuang a ni a, July 20-ah chuan nuai 50 chuang a tling tawh.

Sorkar hnathawkte'n anmahni leh an chhungte damlo tana thla thum chhunga inenkawlna man MSHCS-a an thehluh chu cheng nuai 432 a tling a; MSHCS-in an lo endik hnuah cheng nuai 382 pawmin, Rs. 50,92,401 an paihsak a ni.

MSHCS-a chief executive officer Dr Biakthansangi chuan, "Sorkar thu anga khauh taka kan kalpui a ngaih tâk avang leh sorkar hnathawkte family declaration-ah kan fimkhur avangin damlote MR bill an rawn thehluh hi an fimkhur nghal niin kan ngai," a ti a; MR bill lut tawh zingah dik lo tam tak an hmuh thu a sawiin, July 1, 2018 aṭangin Central Government Health Services rate kalpui a nih tawh tur thu a sawi.

Dr Biakthansangi chuan, Aizawla orivate hospital pakhat aṭangin bill lem panga an hmuh chhuah thu sawiin, "Bill pakhat tê têa siamin, bill panga atan Rs. 5,70,000 an rawn bill a, kan en chiang a, lehkha pawimawh finfiahna tur pakhatmah a awm loh avangin kan paih vek a ni," a ti.

Chutih rualin, Mizoram bikah chuan bill dik lo a tam lutuk lo a, phai lam damdawi-in ṭhenkhatin uchuak takin bill siam an chíng nia sawiin, "Hetiangah hian sorkar chuan sum hum mah se la, damlote'n an tawrh phah ve thung a, a ṭha lo hle. Hetiang hi a bo theih nan phai damdawi-inte tan state sorkarin guidelines a siam mek a, chumi pawm thei damdawi-inte chauh chu sorkarin a thawhpui a ngai tawh dawn a ni," a ti a; sorkarin guidelines a siam thar chu phai lama damdawi-inte inremna siampui tum a nih thu a sawi.

Hetih lai hian, MSHCS hotute chuan, sorkar department zawng zawngte'n family declaration thehlut vek tawh mah se, sorkar department pakhat hnuaia a pênga thawk ṭhenkhatin an la thehlut lo tih an sawi.

Sorkar hnathawkte MR bill dan thar hi Cabinet-in a pawm hnuah Sub Committee on MR din a ni a, Committee rawtna chu sorkarin a pawm vek a ni. August 14, 2017-ah Finance department-in sorkar hnathawkte family declaration chungchang, phai lama inenkawlna tura kalna, thlenna, ei leh in thlengin kaihhruaina a ti chhuak.

September 4, 2017 leh March 1, 2018 khan family declaration chungchangah thuchhuah siam a ni leh a; March 19, 2018-ah MSHCS chuan office memorundum a chhuah leh bakah, April 12, 2018 khan Food and Drugs Administration-in damdawi zuarte hriat turin cash memo chungchangah thuchhuah a siam bawk.