Lawngtlai district-ah tar pension pe lo rei - H Rammawi

MNF National Core Committee member H Rammawi chuan, Lawngtlai district leh district dang ṭhenkhatah tar pension (old age pension) an la lo rei tawh hle niin a sawi a; sorkar chu a rang thei ang bera tar pension pe tura ngenin, "Tar chau mangangte thlavâng hauh tur hian law court hawng tura inbuatsaih mek a ni," a ti.

Mizoram sorkara minister hlui H Rammawi hian July 21, Inrinni khan Aizawl Press Club-ah thuthar thehdarhtute a kâwm a; "Sorkarin tar ṭanpuina thla tina a pek ṭhin chu Lawngtlai district-ah chuan kum khat chuang an dawng tawh lo," a ti a, kum upa lamte an mangang hle tawh tih a sawi.

Lawngtlai district-a tar pension pek loh chhan hi Social Welfare department lam chuan a dawngtute'n bank account an neih loh vang niin kumin April thla tir khan an sawi tih sawiin H Rammawi chuan, "Chief Secretary hnenah bank account an neihzia tarlangin an bank account number-te thil telin May 10, 2018 khan ziakin ka thlen a. Sorkar chuan 'Signal ṭhat loh vang leh current awm ṭhat loh vang’ tiin an chhuanlam leh a ni," a ti.

Hetih lai hian, H Rammawi sawi danin, Saungau, Bualpui NG leh Lawngtlaia Mizoram Rural Bank-te chu ṭha takin an kal reng a, generator an neih vek avangin core banking an ti thei vek tawh a ni.

H Rammawi chuan, Social Welfare minister PC Lalthanliana chuan March 2018 khan tar pension chu March 2018 thleng pek tawh a nih thu a sawi laiin, Lawngtlai district-ah chuan May 2017 hnu lama tar pen­sion pawisa la dawng lo mi tam tak an awm thu a sawi. H Rammawi hian Lawngtlai district-a tar pension late bank account no. ṭhahnem tak a tarlang tel a ni.