KHAWTHLIR

Thisen pe
July 21, Inrinni khan Aizawl Civil Hospital tan Adventist Youth Federation-in thisen unit 85 an pe a, a petute mipa 79 leh hmeichhia paruk an ni a; Vaivakawn Branch KṬP-in unit 29 (mipa 26 leh hmeichhia 3), Khawbel Student Union-in unit 13 leh Kawlkulh Higher Secondary School-in unit 5 an pe bawk. Bethlehem Venglai Branch KṬP-in an rising day pualin Synod Hospital tan thisen unit 62 an pe a, a petute mipa 50 hmeichhia 12 an ni. SAY Central South Division, Serchhip-te'n Serchhip District Hospital tan unit 36 leh SAY Tuichangral-ten Champhai District Hospital tan unit 35 an pe bawk.

Heroin man
Champhaia Excise & Narcotics department leh Khuangleng VDP ṭangkawp chuan nimin zing dar 8:15 khan Khuangleng khuaah heroin gram 151 leh a neitua puh R Lianchhingi (49) w/o C Laldingliana, Khàmráng, Kolsaib district nia inchhál an man. Heroin hi Bolero MZ-07 2815 aṭanga man a ni a, Bolero leh a khalhtu Lalbiakliana (36) s/o Lalthanga (L), Falkland Veng, Aizawl nia inchhál pawh man a ni bawk.

Tlan phal lo
Traffic SP chuan thupek chhuahin, New Secretariat Complex huam chhunga kawngpui, Tuikual lei aṭanga Khatla thlànmual péng inkar chu July 21-25 chhung zauh hna thawh a nih dawn avangin sorkar pisa kai ní-ah chuan zing dar 8-10 leh tlai dar 4:30-6:00 chhung bâk lirthei tlan theih a ni dawn lo tih a tarlang.

Ni 24 khâr tawh
Mizorama lumpsum grant-in-aid higher secondary school pakuate chuan adhoc grant-in-aid dinhmuna hlankai phût vangin sikul an la khar zel. Lumpsum aided HSS pakua Tuisualral HSS, Phullen HSS, Farkawn HSS, NE Khaw­dungsei HSS, East Lungdar HSS, Thingsulthliah HSS, Zobawk HSS, West Phaileng HSS leh Zawlnuam HSS-te hi June 18, 2018 aṭangin khâr a ni a, sorkar chawlh ni tel loin ni 24 chhung khâr a ni tawh.