Zophaia thil thleng chungchangah MZP-in thawhlawm khawn an tum

Mizo Zirlai Pawl (MZP) chuan March 10, 2018-a Bairabi Zophaia Zofate Chawlhbûk sak an tumnaa Assam police-te nen an inawrna leh Assam police-in an bungrua leh hmanruate an tihchhiata an hâlsak chung­changah, sorkar aṭanga zangnadawmna an hmuh theih loh avangin Mizo­rama company lian leh Assam lam mite hnen aṭangin thawhlawm khawn an tum a, Mizo mipuite pawh an remchan anga sum thawh turin an ngen.

MZP hmalak tum dan chung­changah hian MZP gen.hqrs. hruaitute chuan July 21, Inrinni khan an pisaa thuthar thehdarhtute an kâwm a; an president L Ramdinliana Renthlei sawi danin, Bairabi Zophaiah hian Assam police-te'n zirlaite mutbu, pawisa, thawmhnaw, bungbel, mobile phone leh document pawimawh tak tak awmna buk chu an hâl a, motor-te pawh an tichhia a ni. Chu'ng bungrua an tihchhiat leh an hal chhiat zawng zawng hlut zawng chu Rs. 21,70,300 angin an chhût a ni.

L Ramdinliana Renthlei chuan, Assam police-te kut thlakna vanga hliamte enkawlna senso leh zángnadawmna pe tur leh, thil bo leh chhiatte hmuh lêt a nih theih nana sorkar laipui leh Assam sorkara thu an thehluhah tun thlengin chhanna an la hmu lo tih a sawi a, "Mizo min hmuhsitnaah kan ngai," a ti.

MZP President sawi danin, Zophaia an thil neih chi hrang hrang bo leh chhiaah hian a hlutna chhût chhuak a, Mizoram sorkara thehlut turin Home department hotute'n an ràwn a, zangnadawmna pek ngei an tiam a ni. Chuvang chuan MZP chuan bungraw chhia leh hliam enkawlna senso kimchang chu doctor lehkhate leh MVI report-te nen an thehluh bakah, Chief Minister leh Home Minister pawh an sawipui nghal a ni.

July 19, 2018 khan Home department aṭangin lehkha kan dawng a, chutah chuan Zophai buainaa thil bo, chhia leh damlote senso chu Mizoram sorkarin a tumsak theih loh thu hriattir an ni.

Home department aṭanga lehkha an hmuhah hian an lung­awi lo hle tih sawiin L Ramdinliana chuan, "Zirlaite hmuhsitna leh ram leh hnam tana thisen lo chhuah tawhnate chu engahmah a ngai lo tihnaah kan ngai a; chuvang chuan, Mizorama company lian tak tak leh Assam mi leh sa, Mizoram chhunga awmte hnenah a ram pum angin MZP-te'n kan thiam danin sum leh pai khawn mai ni se a ti ta a ni," a ti.

L Ramdinliana chuan, hnam dangte hnenah sum khawn an tum thu a sawi rualin, a ṭul angin Mizo mipui hnenah pawh vehbûr khawn an tum thu a sawi a; mahni remchan ang leh phal ang sum leh pai thawh ve turin Mizo mipui leh pawl hrang hrangte an ngen. Hemi rual hian, Zophaiah Zofate Chawlhbuk sak an la tum reng tih a sawi.

Sum leh pai an khawn dan tur chungchanga zawhna chhangin MZP President chuan, "Kan thiam dan ang angin hma kan la ve tawh dawn a, a ṭul chuan kan tharum ve deuh mai ang," a ti a; an thil tih tur chu Phai lama Mizo zirlaite tawrhna thleng lo tur zawnga tih an tum thu a sawi bawk.