Kawlchaw-ah Theihai Kût hman a ni

Siaha district-a Kaochao East (Kawlchaw East) khuaah July 20, 2018 khan Theihai Kût (Mango Fruit Festival) hman a ni a, Mara Autonomous District Council-a executive member (Horticulture) KH Beihlo-a'n a hmanpui. Mango Fruit Festival-ah hian Kawlchaw-a theihai chíngtute'n Horticulture department, KVK Siaha leh AMFU Siaha district ruahmanna siam angin an theihai tharte an pho chhuak a ni.

Kaochao East-ah hian chhungkua 237 awmin, chu'ng zinga chhungkaw 83 chuan theihai an chíng a; tunah hian Kawlchawhai kung 32,608 an phun tawh. Kum 1984-2010 chhunga theihai aṭanga sum an lak luh zat an hre thei lo a, kum 2011 aṭangin mulmal taka chhinchhiahin, kum 2011 aṭanga 2018 thlengin quintal 1,38,391 an thar tawh a, Rs. 82,48,250 an la lut tawh a ni.

Theihai Kûtah hian theihai chíngtu hlawhtlingte hnenah KH Beihlô chuan lawmman a sem a; a thar ṭha ber JC Laikhai chuan kum 2016-2017 chhungin metric ton 40 tharin, Rs. 3,50,000 a la lut a, pahnihna J Sachhua-a'n metric ton 37.5 vel tharin Rs. 2,75,000 a la lut a, pathumna K Biaklawma'n metric ton 30.5 tharin, Rs. 2,50,000 a la lut bawk.