Mamitah police patrolling uar leh zual tum
Mamit SP Devesh Kumar Mahla chuan, Mamit district chhunga dan leh thupek kenkawh kawngah theihtawp an chhuah thu sawiin, Mamit khawpui chhungah chhunah leh zana patrolling neih ṭhin chu uar zawka kalpui an tum thu a sawi.
Mamit SP hian July 20, 2018 khan a pisaah Mamit district MJA-te a kawm a, thil hrang hrang an sawiho. SP chuan, mimal harsatna nei leh ṭanpui ngaite tan phone no. 0389-2565724 ah emaw, a mimal mobile phone no. 7011229498-ah engtik lai pawha biak theih a nih thu a sawi a; Mamit khawpui leh district chhung a rálmuan zawk theih nan leh ruihhlo laka a fihlim theih nan ralthuam leh ruihllo zuar leh tawlhte chu police-a hriattir zel turin mipui a ngen.
Devesh Kumar Mahla chuan, Mamit ṭhalaite tan taksa sâwizâwina hmun gym leh naupangte tan children park siam a tum thu te, Mamit district ṭhalaite'n competitive exam ti duhte tan coaching class pek a inhuam thu leh chuta tan chuan Mamit College leh Mamit HSS zirtirtute a biak tawh thu te, ṭhalaite'n sipaia an luh an châk nan theih nan sipai hmunte tlawhpui a inhuam thute a sawi.
Mamit DP-in zawhna a chhàn danin, Mamit district-ah police indaih lohna a nasa a, police awm tur zat (sanction strength) chu 235 a nih laiin, 150 chiah an awm mek a; police indaih lohna chungchang chu Police Headquarter-ah a then tawh. Tripura aṭanga Bru lak let an nih dawn avangin police mamawh belhna a sàn lehzual thu a sawi bawk.