Pawisa lem kawltu táng turin hrem

Pawisa lem cheng 6,83,000 kawla puh Lal­chawimawii, Durtlang North chu Court-in thiam loh a chantir a, thla ruk chhung jail-a táng tur leh Rs. 50,000 chawi turin a hrem.

Additional public prosecutor H Lalmuan­kima sawi danin, Mizoram police-a CID-te'n an thu dawn bawhzuiin Lal­chawimawii kut aṭangin November 20, 2015 khan Rs. 1,000 note lem 565 leh Rs. 500 note lem 236 an man a, pawisa lem an man hi Rs. 6,83,000 ang a ni.

Lalchawimawii lakah Aizawl Police Station-ah thubuai ziahluh niin, IPC Section 489-C hmangin thubuai siamsak a ni. Thubuaiah hian Aizawl Judicial District-a session judge Joel Joseph Deng­a chuan tun hnai khan thutlukna siamin, Lalchawimawii chu thla ruk chhung táng tur leh Rs. 50,000 chawi turin a hrem a; pawisa chawi tur hi a pek theih loh chuan thla thum dang tàn belh turin a ti bawk.