Rosiamngheta'n a bialte Ambulance pathum a pe

Aizawl Municipal Corporation (AMC) Ward-V bialtu councillor Rosiamngheta chuan nimin khan GIG Motor Showroom, Edenthar Vengah a bial chhunga veng pathum - Zarkawt, Chanmari leh Electric Veng hnenah ambulance a hlân.

Rosiamngheta chuan, Mizoramah ambulance pakhat hi mi 65,000 zelin an inṭâwm ang a nih thu sawiin, "Hei hian ambulance kan indaih lo hle tih a tilang a, chuvangin, ka bial chhunga veng pathumte tana ambulance pek ṭhain ka hria a ni," a ti.

Ambulance chu AMC-a property tax lut khawm aṭanga a bial chanpual hmang­a lei a nih thu sawiin Rosiam­ngheta chuan, "Mipuiin chhiah an pek aṭanga sum hmuhte chu mipui tan pêk lêt leh a ni," a ti a; khawtlang hruaitute chu mipui 50%-a tláwma hmantir tur leh mi harsate chu a thlàwna hman tir turin a chah.

Ambulance pakhat atan hian Rs. 6,00,000 vel sên niin, a chhungah oxygen kit dah a ni a; ambulance chahbi chu MPCC president Lal Thanhawla'n veng pathum khawtlang hruaitute hnenah a hlân a ni.