Covid-19: Thlai, thei leh pawisa inpe

Mizorama khaw ṭhenkhata task force-te chuan an khaw mipuiin thlai an tharte Aizawl leh khawpui danga task force-te hnenah community quarantine facility-a awmte tan leh veng chhunga sem turin a thlawnin an la pe mek zel

Champhai district-a Samthang khuaa self-help group leh village task force-te hmalaknain Samthang khaw mipuite chuan YMA Day (June 15) khan an thlawhhmáa an thlai thar chi hrang hrang an la khawm a, chu'ngte chu nimin zing khan Mission Veng Local Task Force (LTF) hnenah a thlawnin an pe.

Thlaite hi a thlawna pek ni mah se, Mission Veng LTF chuan lirthei tui man atan Samthang Welfare, Aizawl kaltlangin pawisa an lo pe ve bawk a; thlai an dawnte chu an veng mipui hnenah a thlawnin an sem a ni.

Zonuam Branch YMA, Aizawl pawhin YMA Day pualin nimin khan ramria duty leh Zoram Medical College (ZMC) a thawkte thilpek an hlan. Zonuam YMA hian Tuisual Group YMA huam chhunga ramria duty-te hnenah Rs. 55,000 leh ZMC a thawkte hnenah Rs. 10,000 an hlan a, ramria a duty avanga nunna chan Caroline H Lalvenmawii Rs. 5,000 in an ral bawk. 

Kepran task force pawhin an khaw mite'n June 15, Thawhṭannia anṭam têl 2,500 an lak khawm chu nimin khan Ramhlun North LTF hnenah a thlawnin an pe a, Ramhlun North LTF chuan an veng chhung in tinah a thlàwnin an sem ve leh a ni. 

Serchhip district-a khaw pathum - Hriangtlang, Chhing­chhip Mualpui leh Khawlailungte chuan Serchhip district-a quarantine centre hrang hranga awm mekte ei turin nimin khan district bawrhsap Dr Lalzirmawia Chhangte hnenah thlai leh thei chi hrang hrang leh pawisa an hlàn.

Thingfal Branch YMA chuan YMA Day pualin Thawhṭanni khan Lawngtlai District Task Force hnenah chawhmeh thlai chi hrang hrang leh pawisa Rs. 20,000 an pe a; Lawngtlai SDO (Sadar) V Lalruatliana'n a 

ṭula hman atan silpauline a hlan ve thung. Tuichawng Group YMA pawhin Lawngtlai District Task Force-ah Rs. 3,000 an thawh bawk.