MSLSA hnuaiah post 38 hnawhkhat turin High Court-in Mizoram sorkar a hriattir

Mizoram State Legal Service Authority (MSLSA)-in Mizoram sorkar an khin avangin Gauhati High Court (GHC), Aizawl Bench chuan Mizoram sorkar chu MSLSA-a post 38-te a rang lama siam tur leh hnawhkhat turin a hriattir.

MSLSA ukilte'n Court-a an tarlan danin, Legal Services Authorities Act, 1987 hnuaia September 11, 1997-a notification chhuah a nih angin, Mizorama district pariatah June 2, 2014 khan District Legal Services Authorities (DLSA) din a ni. DLSA ṭha taka a kal theihna atan Alternate Dispute Resolution Centre-a thawk turin post 38 siamna notification pawh June 1, 2011-ah tihchhuah a ni.

Post 38 hi 13th. Finance Commission hnuaiah co-terminus kalphunga siam a ni a, muster roll kalphunga hnawhkhah (fill-up) tur niin, February 28, 2015 thleng thawk tura lak an ni. 13th. Finance Commission term a tawp hnua harsatna a awm lohna atan MSLSA chuan Member Secretary kaltlangin Mizoram sorkar hnenah co-terminus post chu state fund hnuaia temporary post-a let tura ngenna an thawn.

MSLSA ngenna chu Mizoram sorkarin a hnâwl a; chumi hnuah MSLSA chuan

ṭum eng emaw zat post 38-te chu state fund hnuaia temoprary-a siam tura ngenna an thawn leh a ni. Post 38 chu siam a nih loh chuan MSLSA leh DSLA kalphung a buai theih tur thute tarlan ni mah se, a hlawhtling thei lo.

MSLSA ukil chuan High Court-ah Law & Judicial department-in September 1, 2017-a office order a tihchhuah chu a thehlut a; office order-ah hian MSLSA hnuaiah UDC 10, LDC 12, group D pariat leh peon pariat post sanction a nih thu tarlan a ni.

MSLSA thubuai thehluh chungchangah hian GHC, Aizawl Bench chuan tun hnai khan thutlukna a siam a, Mizoram sorkar chu post 38-te a rang lama hnawhkhat turin a hriattir a ni.