Kum 7 chhungin POCSO hnuaiah Thubuai 689 ziah luh a ni

Tun hnai kum sarih, 2012-13 aṭanga 2018-19 chhungin Mizoramah naupang kumtlinglo khuaikhem leh pawngsualte hremna dan, 'Protection of Children from Sexual Offences (POCSO) Act hnuaiah thubuai 689 ziah luh a ni.

Child Welfare Committee (CWC), Mizoram chhinchhiah danin, kum sarih chhung hian kumtlinglo hmeichhe khuaikhem/pawngsual thubuai 630 leh mipa khuaikhem/pawngsual thubuai 59, a vaiin thubuai 689 ziah luh a ni. Thubuai ziah luh tam ber kum 2017-18 chhungin thubuai 164 ziah luh a ni a, sorkar kum kal mek 2018-19 ah June 2018 thlengin thubuai 29 ziah luh a ni tawh.