ZPM-in mi pahnih lakah FIR thehlut tawh

Zoram People Move­ment (ZPM) chief minis­terial candidate Lalduhoma chuan, Mizoram hmun hrang hrangah ZPM-in steering committee an din belh zel tih a sawi a; chutih laiin, thu dik lo hmanga ZPM-in beih a tawh chungchangah mi pahnih lakah FIR thehluh a nih tawh thu a sawi.

Nimina ZPM pisaa in­khawmah Lalduhoma chuan, "Ni tin ZPM stee­ring committee a ding zel a, chutih laiin, beihna kan tâwk zel bawk. Beihna kan tawh avangin kan mi leh sate leh party rilru pu lo neutral-te thinlung a chîâi tih kan hriat avangin pawi kan ti a, hei vang hian ZPM chuan mi pahnih lakah FIR Kan thehlut tawh. Thu dik hi dingchangin thu dik hi mi tinin hria se kan duh a, chutiang bawkin thu dik lo pawh a awm a nih pawhin mipuiin hre vek se kan duh a ni," a ti.

Inrêlbâwlna (admi­nistration) chungchanga ZPM policy sawiin Lal­duh­oma chuan, "New Secretariat Complex-ah Chief Minister Office leh Secretariate office zawng zawng dah tum a ni. Tuna kan kalphungah hian file a kal muang a, hna a sâwt lo a, hna pending a tam phah. Mipui rawngbawltu an nih ang ngeiin, chak taka hna an thawh theih nan office pawimawh zawng zawng hmun khata awm hi thil ṭul tak a ni," a ti a; Cabi­net mee­ting pawh Aizawl­ah chauh nei loin, district khaw­pui dangah pawh neih ve ṭhin an tum thu a sawi.

Lalduhoma chuan, March 10, 2018-a Baira­bi Zophaia MZP-te bung­rua Assam police-te'n an tihchhiat vanga zangna­dawmna an dil Mizoram sorkarin an pek theih loh thua a chhâng chu lung­chhiat­­thlak an tih thu a sawi a, "MZP-te'n vehbûr khawn an ti ta a, an mamawh an khawn chhuah theih ngei kan duh a, an khawn chhuah theih nan ZPM chuan kan thláwp tlat a ni,” a ti.