Rannung seh natna vangin Sawlengah July, 2018 chhungin mi pahnih an thi

Tunlai hian Aizawl district-a Sàwleng khuaah rannung seh natna, (scrub typhus) a leng mek a, tun July thla chhungin mi pahnihin an thih phah tawh a; a vei mek mi 20 vel an awm.

Sawleng Branch YMA president R Lalthanzama'n Vanglaini palai zawhna chhánga a sawi danin, Sawl­eng khuaah hian rannung seh natna hi July 2018 thla tìr lamah hmuh ṭan a ni a; nimin khan Darlawn damdawi-ina enfiah mi eng emaw zat zinga 10 chuan an vei tih hmuh chhuah leh niin, a hmaa hmuh chhuah tawhte nen tunah hian mi 20 velin an vei mek.

Sawleng khuaah hian scrub typhus vangin July 12, 2018 khan RD Lalfakzeli (11) chu a thi a; July 22, Pathianni khan Thangzalala (45) chu a thi leh bawk. Anni pahnih hi July thla tìr lama scrub typhus an vei tih hmuh chhuah ve ve an ni.

R Lalthanzama chuan, vawiin hian an khuaah Aizawl lam aṭangin mithiamte an kal dawn a, rannung seh natna vei nia inringhlelte enfiahna hun buatsaih a ni dawn tih a sawi a; chutih rualin, "Test hi a thlàwnin an ti thei dawn lo a, test atan hian mi pakhat tan Rs. 250 sên a ngai a, hei hi mi ṭhenkhat tan a harsat theih avangin a chanve tal an tum theih nan Group YMA-in tih dan tur kan ngaihtuah mek a ni," a ti.

Health department aṭanga thu dawn danin, nimina Darlawn damdawi-ina inendiktirte hi mi 50 an ni a, chu'ng zinga mi 10 chuan rannung seh natna an vei tih hmuh chuuah a ni. Vawiina an khuaa clinic nei turte chu Aizawl East Chief Medical Officer pisa aṭanga kal turte niin, Senior Me­dical Officer-in a ho dawn a ni.

Integrated Diseases Sur­veillance Programme (IDSP) state nodal officer Dr Pachuau Lalmalsawma chuan, rannung seh natna chungchanga Sawleng dinhmun chu an thlithlai reng thu a sawi a; tunah chuan district-a surveilance team-in an buaipui phawt a, a ṭul a nih chuan state surveilance team pawhin an buaipui theih reng thu a sawi bawk.