KHAWTHLIR

Fai inelna tan
India ram puma state, district leh thingtlang khawfai inelna Swachh Survekshan Grameen, 2018 chu nimin aṭang khan Aizawl district-ah kalpui ṭan a ni a, DC conference hall-ah additional DC John LT Sanga'n a hawng. Intihsiaknain a tum ber chu, India rama state, district leh thing­tlang khuate faina lama hma an sawnna tur leh inelna thianghlim neih zelna tura tih a ni.

Tlan phal lo
Traffic SP H Ramthleng­liana chuan thupek chhuahin, July 25-31, 2018 chhungin PWD-in Electric Veng Church Street-a SIPMIU-in sewerage pipe an phûmna atana kawng an laih ­chhiat chu an siam ṭhat dawn a, hna thawh ­chhungin he kawngah hian lirthei tlan phal a nih dawn loh thu a tarlang.

Secretary-in hawng
PMKSY WDC (IWMP) Aizawl-VII, Darlawn RD Block huam chhung - Pehlawn, East Phaileng, Kepran leh Sawleng khuaa tui dah khawlna leh thlai dahna siam tharte chu July 20, 2018 khan Mizoram sorkara principal secretary Lalnunmawia Chuango-in a hawng. Tui leh thlai dah khawlna siamte hi AMFU enkawl a ni.

MHIP-in an dem
MHIP general headquarters chuan thuchhuah siamin, Lucy Lalrinsangi (26), d/o C Hualliana (L), New Siaha East, nau thla ruk mi pai mek chu a pasal Vanlalmalsawmdawngkima s/o M Haisua, Siachangkon-in a sawisak avangin July 22, 2018 zan khan a thi tih an tarlang a; "He thihna a mawhphurtu Vanlalmalsawmdawngkima hi dan anga a na thei ang bera hrem kan phût. MHIP chuan hetiang thil rapthlak tak a thleng hi pawi kan ti a, thleng tawh lo se kan duh tak zet a ni," an ti.

In saksak
Mamit Dinthar Presbyterian Kohhran chuan an kohhran mi, mahni chauh­a khawsa pakhat, kum 88 mi chu in an saksak a, an sak zawh hnuah July 22, Pathianni khan a neitu hnenah an hlan. In hi a dung ft. 18 leh a vâng ft. 15f-a zaua sak a ni a, Mamit DC-in Rs. 1,01,000 a pek bakah, Mamit Dinthar Kohhranin thingzaite thawhin hnatlangin an saksak a, bungbel ṭhahnem tak an leisak bawk.