Aizawla êk-in thlî paihna leh sawngbawlna tur December 2018-ah enchhin tum a ni
State Investment Programme Management and Implementation Unit (SIPMIU), Aizawlin Aizawl khawpuia êk-in thlite sawngbawlna tur, Sewerage Treatment Plant (STP) an buatsaih leh network an siam mek chu June 2019-ah zawh fel theih an beisei a, December 2018-ah enchhinna (trial run) neih an tum.
SIPMIU project director Valbuanga chuan zawhna chhangin, SIPMIU-in Chite lui kama STP a siam chu an zo tawh a, generator hmangin an enchhin tawh tih a sawi a, "Power & Electricity department-in power supply min la pe lo a, min pek hunah chuan hman theih a ni tawh ang," a ti.
Chite lui kama STP chu siam zo tawh mah se, êk-in thli lak khawmna tur pipe line (network) an la zo lo tih sawiin, "Network line zawh loh a la awm a, Mirâwng lui leh Theihai luiah pipe lian kan la phum zo lo," a ti a; network pipe phûm hna chu kumin chhungin zawh hman an inbeisei thu a sawi.
Chite lui kama STP siam hi Aizawl chhuah lama veng 19-te'n an hmang thei dawn a, kum 2045 thleng dâwl zo tura ngaih a ni. A hmang thei tur vengte chu - Aizawl Venglai, Electric Veng, Ramthar Veng, Ramthar North, Chhinga Veng, Ramhlun South hmun ṭhenkhat, Armed Veng, Armed Veng South, Tuithiang, Zarkawt, Chite, Chanmari, Upper Republic veng ṭhenkhat, Bethlehem Veng, College Veng hmun ṭhenkhat, Bethlehem Vengthlang, Venghlui hmun ṭhenkhat, Dawrpui leh Saron Vengte an ni.
Chite kama STP siam hna hi Eco Protection Engineers, Chennai-te'n an thawk a, sum ruahman zat chu nuai 1943.60 a ni. A hmunhma leh a panna kawng siam hna chu CLT Construction, Vaivakawn-in an thawk thung a, a siam nan cheng nuai 343.37 ruahman a ni. Sewerage network (pipe phûm, etc.) atan cheng nuai 3172.92 ruahman niin, Tantia Constructions, Kolkata-in an thawk thung.
Valbuanga chuan, STP hi hman a nih hunah chuan chhungkaw tinte a thlawnin connection tihsak an ni dawn tih a sawi a, "A taka hman a nih hunah chuan chhungkaw tinin an hman ngei tur, compulsory a ni ang," a ti.
STP network pipe phûmna atana kawngpui ṭha lai laih chhiat hnua an siam ṭhat (blacktop) lehte a ṭhat tawk loh chungchanga zawhna chhángin Valbuanga chuan, a vawi khatna atana an blacktop bakah, kum khat hnuah an blacktop nawn leh dawn tih a sawi a; kawng laih chhiat hnua siamṭhat leh hna zinga a tam zawk chu SIPMIU-in an siam a ni a, ṭhenkhat chu PWD siam a nih thu a sawi bawk.
Tuiriala bawlhhlawh sawngbawlna tur hmun, Solid Waste Management Center siam hna thawh mek chungchangah SIPMIU Project Director chuan, an zo ṭêp tawh a, bawlhhlawh sawngbawlna tur khawl an order tawh thu leh a in tur an sak zawh hunah lak luh nghal tur a nih thu a sawi a, "Kumin October thlaah trial run (enchhin) kan tum a, kumin December thlaah chuan tuna bawlhhlawh paihna hi chhuahsan kan tum," a ti.
Solid Waste Management Center siam nan hian cheng nuai 3057.99 ruahman a ni a, July 1, 2016-ah hna ṭan niin, contractor chu V Lalbiakzama, Venghlui a ni.