CADC MDC-te'n thubuai an awrh dawn - MNF Vigilance Committee Secretary

MNF Vigilance Committee secretary David R Lalsawmtluanga chuan, Chakma Autonomouse District Council (CADC) sorkar term hmasaa Congress MDC 13 leh official pahnihte'n eiruk thubuai an awrh dawn nia sawiin, hei vang hian an ukilte kaltlangin anticipatory bail an dil dawn niin a sawi.

Nimina Mizo Hnam Runa inkhawmah David R Lalsawm­tluanga chuan, CADC sorkara eirukna a awm nia hriat chung­changah Governor remtihnain Mizoram sorkara DCMA department-in a chhui turin July 11, 2017 khan mi pakhat awmna Enquiry Commission a din tih a sawi a, "Commission Dr A Muthamma chuan a thil hmuh chhuah report pawh August 8, 2017-ah Mizoram sorkarah a thehlut tawh a ni," a ti.

R Lalsawmtluanga chuan, Enquiry Commission report-ah chuan CADC-a Congress sorkar­ah 'Dik lo takin sum a khawih chingpen a awm' tih a ziak lang a, 'A ti dik lotute chungah Mizoram sorkarin dan anga hremna lekkawh a, criminal case siamsak an nih theih nan hmalak ni se,' tiin rawtna a siam niin a sawi a; August 25, 2017-ah Governor-in a pawmpui niin a sawi bawk.

MNF Vigilance Secretary chuan, "Sum hman dik loh vangin CADC-a Congress MDC leh official 15 zette chuan jail bang an zût a ngai dawn ta niin a lang. Tun hmaa an hrisel hmel teh lul nen, hrisel lohna rûk an lo nei nge ni, vawiin July 23 hian anticipatory bail dil turin an inpuahchah a ni. Roreltute pawhin dan ang taka mipui sum khawih chingpentute chunga ro a rel kan beisei tlat a ni," a ti.

David R Lalsawmtluanga chuan, Enquiry Commission report-a lang, cheng nuai 170 latu Kali Kumar Tongchangya, CADC sorkar hmasaa chief executive member lakah thubuai ziah a ni ve lo nia sawiin, mak a tih thu a sawi a; Kali Kumar Tongchangya lakah thubuai ziah luh ve an phut thu a sawi.

MNF Vigilance Committee Secretary sawi danin, Enquiry Commission report bakah, Mizoram Assembly session hnuhnung bera CAG report pharh taka phek 53-naah CADC sum chingpen chungchang ziah a ni a, 'State sorkarin heng dik lo taka mipui sum khawihna chungah hian FIR a thehlut tur a ni' tia ziah a ni.