HSS pakua dinhmun ṭha zawka dah turin Mizoram sorkar phût

Hmar Students Association (HSA) chuan thuchhuah siamin, Mizoram Govt. Lumpsum Grant-in-Aid Higher Secondary School Association (MIGLAHSSA)-in adhoc grant-in-aid dinhmuna hlankai an phût chu Mizoram sorkarin tihlawhtling thuai se an duh thu an tarlang.

HSA chuan, MIGLAHSSA-in lumpsum aided higher secondary school (HSS) pakuate adhoc aided dinhmuna hlankai an phut chu âwm an tih thu sawiin, "Kum 14 zet khawtlangin an lo enkawl tawh hi mipui phurrit a tling tak zet. Sikul naupang 850 lai mai sikul kal thei lo leh first term exam thei loa an awm hi pawi kan ti hle a ni," an ti.

HSA hian khawtlang mipui leh zirlaite harsatna sukiang thuai tur leh, HSS pakuate chu a rang thei ang bera adhoc aided-a hlang kai a, zirlaite'n ṭha taka zirna an chhunzawm theih nana hma la turin Mizoram sorkar an phût a ni.

HSA chuan, July 2018 chhunga hmalakna emaw, thu thar lawmawm emaw a awm lo a nih chuan HSA, Sinlung Hills chuan na taka sorkar nawr an tum thu leh, a ṭul a nih chuan nasa zawkin zirna-inte khâr tura an inpeih thu an sawi a, "Sikul pakuate upgrade nana harsatna leh chhuanlam siama sum a awm lo tia kan sorkarin a sawi ṭhin hi kan hrethiam lo hle a ni," an ti.

Tuipuiral Zirlai Pawl (TZP) pawhin thuchhuah siamin, MIGLAHSSA thil phûtah sorkarin chhànna a neih loh vanga zirlaite’n hun rei tak zirna an chawlhsan chu pawi an tih thu leh zirlaite'n zirna chhunzawm thuai se an duh thu an tarlang.

TZP chuamn, "Kan member, zirna chhunzawm thei lote hi sorkarin a ngaihsak lo a nih chuan, a ṭul anga hmalak ve kan tum. Khaw pakuaa zirlai intél khawm Joint Students Union hmalakna pawh kan thláwp tlat a ni," an ti a; lumpsum aided HSS pakuate thil phût chu sorkarin tihlawhtling thuai se an duh thu an sawi.