Hospitality skill training buatsaih dawn

Columbia & Stanford University chuan Social Justice Development India (SJDI), Skill Training Provider kaltlangin Aizawlah hospitality skill training an buatsaih dawn a, training chhuakte chuan gulf ramah hna thawh theihna remchang an nei dawn niin an sawi.

Training buatsaih tur chungchangah Columbia & Standford University leh SJDI aiawhte chuan nimin khan Aizawl Press Club-ah thuthar thehdarhtute an kâwm a; Columbia University-a Ph.D scholar Kolbeg Hanson chuan, training chhuakte'n hna an hmu a nih chuan an ngaih pawimawh hmasak ber tur chu an himna a nih thu a sawi.

Vanglaini palai zawhna chhangin Kolbeg Hanson chuan, training chhuakte hna zawnsaktu tur atana an thawhpui Vira International, Mumbai-in Mizo ṭhalaite dinhmun an hre chiang niin a sawi a, "State dangah hospitally lama training chhuak ṭhalai an duh ang an hmu ṭhin lo a, Mizo ṭhalaite hi an duhzawng an ni a, chuvangin tun ṭumah pawh training hi Mizo ṭhalaite tana buatsaih a ni," a ti.

Columbia & Stanford University leh SJDI aiawhte sawi danin, training hi Mizo ṭhalai 250 tana buatsaih tur niin, thla nga chhung training tur a ni. Dil duh tan chuan SIJD office, Aizawlah July 27, 2018 thleng dilna thehluh theih a ni a, kum 18 tling pawl 10 pass tan dil theih a ni.

Training zawhah gulf ram - Dubai, Abu Dhabi, Kuwait, Qatar, etc. aṭangin company hotute an lo kal ang a, Aizawlah interview neiin, an duh zawngte chu kum hnih chhung atan contract an ziahpui ang. A tlingte chu an visa, kal man leh an contract zawh huna an haw lehna tur ticket an tumsak vek dawn a ni.