Agriculture Minister-in tractor a vai liam
Buh leh bàla intodelhna tura hmalakna zinga pakhat atana Sub-Mission on Agricultural Mechanization (SMAM) 2019-20 hnuaia lei tractor panga chu custom hiring centre-a hman turin nimin zing khan Agriculture minister C Lalrinsanga'n Agriculture directorate tual aṭangin a vailiam.
Agriculture Minister chuan, Covid-19 léng karah intodelh duhna leh intodelh theia inhriatna mipui rilruah a awm tih sawiin, "Hmasawn tura chhungkaw tin an phe suau suau hi a ropui hle. Hei ngei hi hnam leh sakhaw humhalhna ki pui ber a ni," a ti.
Hnam zahawm ni tur chuan chhungkaw tin fairèl bél a khah a ngaih rualin, Mizorama thar chhuah ni lo dailuah, alu, purûn, tomato, tél leh thil dangte Mizoram aṭanga lak luh ngai loa awm a ngaih thu sawiin C Lalrinsanga chuan, state leh ram dang aṭanga châwk luh bungrua, thlai leh rante hi taimakna hmanga hnawt chhuak turin mipui a sáwm.
Agriculture Minister-in a vailiam tâk tractor-te hi Tuipui Zau (Tlangsam), Chhimluang WRC Farming Society (Kawlkulh), Farming Cooperative Society (Ruantlang), Dingdihlipa Sih Zau (Chawngtlai) leh Zopui (Champhai)-tea hman tur a ni.
SMAM hnuaiah kumin chhungin Agriculture department-in trailer, rotavator leh paddy reaper telin tractor 50, power tiller lian 75 leh mini power tiller 75 sem chhuah tum a ni.