Covid-19 vei mi 9 hmuh belh a ni Endik hmasakah an vei lo vek

Zoram Medical College (ZMC) Covid-19 Laboratory-a June 30, Thawhlehnia swab sample endik aṭangin Covid-19 hripui vei mi pakua hmuh chhuah belh a ni a, heti hian Mizorama hripui vei hmuh chhuah tawh zawng zawng chu mi 160 an tling ta. Covid-19 positive hmuh thar pakuate hi June thla tìra endiknaa negative tawhte vek an ni.

Thawhlehnia district hrang hrang mi sample endikte chu - Aizawl 94 (mipa 67, hmeichhia 27), Lunglei pakhat (hmeichhia), Serchhip 19 (mipa 11, hmeichhia 8), Siaha 43 (mipa 32, hmeichhia 11) leh State Referral Hospital (SRH)-a awm mek 10 (mipa leh hmeichhia 5 ve ve) an ni.

ZMC-a Thawhlehnia swab sample 167 zinga mi pakuain hripui an vei laiin, mi 158 chu an fihlîm thung. Covid-19 vei hmuh chhuah tharte hi Siaha district mi, tun hnaia Delhi aṭanga haw an ni a, mipa pariat leh hmeichhia pakhat, kum 18-28 inkar an ni. Pariatte'n an taksaah harsatna an neih loh (Covid-19 symptom lang lo) laiin, pakhat erawh chuan symptom a nei thung.

Covid-19 vei hmuh chhuah thar mi pakuate zinga tlangval pakhat hnen aṭanga thu dawn danin, mi pakuate hi June 4, 2020 khan swab sample endiksak an lo ni tawh a, chutah chuan hripui an kai lo vek tih hmuh a ni. June 25 khan swab sample lak nawn leh niin, Thawhlehni khan ZMC laboratory-a endik a ni a, hripui an vei tih hmuh chhuah a ni ta a ni.

Mi pakuate hi Siahaa Dedi­cated Covid Health Centre (DCHC) - District Hospital building tharah an awm a, an zinga pakhat symptom lang chu Isolation Ward-ah dah a ni. He DCHC-ah hian June 4 veka Covid-19 vei lo tih hmuh tawh, June 21-a endik nawnnaa hripui vei tih hmuh chhuah leh tak mi pakhat a awm bawk a; an vaiin DCHC-ah hian mi 10 an awm mek.

Siaha district-a Covid-19 vei hmuh chhuah tawh mi 18 zinga pakuate chu June 4-a endiknaa hripui vei lo tih finfiah tawh, a hnua endik nawnnaa an vei tih hmuh chhuah leh takte an ni. State páwn aṭanga an haw tirhah chuan quarantine centre pakhatah an awm a; June 4-a endiknaah an zinga pakhat chu Covid-19 a vei tih hmuh a nih avangin sawn chhuah an ni.

Sawn chhuah an nih hnuah pakhat chu June 21-a endik nawnnaah Covid-19 a vei tih hmuh chhuah a ni a, June 30-a endiknaah mi dang pakuate pawhin hripui an vei tih hmuh chhuah a ni leh ta a ni. Hetih lai hian, quarantine centre-a an awmpui pakhat, Covid-19 vei tih June 4-a hmuh chhuah erawh chu a dam tawh avangin chhuahtir a ni tawh thung.

June 21-a Covid-19 vei hmuh chhuah tawh pakhat hi June 30-a swab sample lâk nawn leh tura tih a ni a, mahse, nimin thleng kha chuan lak nawn leh a la ni lo.