E.Roll aṭanga Bru-te paih turin Hmalak chhunzawm zel a ni

Tripura refugee camp-a awm Bru, Mizoram electoral roll-a chuangte paih a, Tripura electoral roll-a dah luh an nih theihna turin hmalak chhunzawm zel a ni.

Mizoram Election department hotute hnen aṭanga Vanglaini thu dawn danin, Mizoram lam aṭang chuan Bru-te electoral roll aṭanga paih a nih theihna turin thil pawimawhte Election Commission of India (ECI)-ah thawn a ni tawh. Hetih lai hian, inremna siam angin Tripura sorkar lamin an tih turte an tih ran ve a ngai thung.

Tripura-a Bru-te tana chhawm­dawlna hrang hrang pek chu Tripura sorkar kutah dah a ni a, Mizoram electoral roll aṭanga Bru-te paih tur chuan chhawm­dawlna an dawn tur angte an dawn a ngai niin an sawi.

Tripura sorkar lamin an tih turte an tihfel hunah Bru-te chu Mizoram electoral roll aṭanga paih ECI-in an remtih nghal mai beisei a ni a, kum thar lamah chuan tihfel theih rin a ni.

Kum 2018-a Assembly inthlanpuiah khan Tripura refugee camp-a awm Bru zingah Mizorama vote nei mi 11,987 an awm. Kumin October 30-a Tuirial bial MLA by-election neih zawh tâkah khan Bru-te tan special polling station leh ballot paper siam a ni lo a, Tripura aṭanga vote rawn thlak an awm lo.

Kum 2020 tìr lamah khan sorkar laipui, Tripura leh Mizoram sorkar leh Bru pawl aiawhte chuan inremna an ziak. Inremna ziah a nih dan chuan, Tripura-a awm Bru zingah Mizorama kîr duh an awm chuan an kîr ang a, kîr duh lote erawh chu Tripura-ah an awm zui thei a ni.

Inremna anga hamṭhatna awmte chu Bru chhungkua 5,400, mi 34,000 velin an hmu thei dawn. Bru refugee-te chu an awmna tur ram, ft. 40X30-a zau pek tur a ni a, fixed deposit-in Rs 4,00,000 dahsak an nih bakah, kum hnih chhung thla tin Rs 5,000 leh ration a thlâwna pek tur a ni bawk.