Vanglaini logo

PAHOSS hnuaia in sak zawhte hawng

Parking House Support Scheme (PAHOSS) hnuaia Aizawla parking house sak zawh tawh 11 chu nimin khan chief minis­ter Zoramthanga, deputy chief minister Tawnluia leh Aizawl mayor Lalrinenga Sailo ten an hawng. Chief Minister chuan, PAHOSS chu a ṭangkai belh zel tur thu a sawi.

Parking house hawnte chu an awmna veng azirin zone pathum - north zone, south zone leh west zone-ah ṭhen a ni a; Chief Minister-in north zone-ah a hawng a, Dy CM-in west zone-ah hawngin, AMC Mayor-in south zone-ah a hawng. Chumi hnuah Hyve Hall-ah hawnna inkhawm buatsaih a ni.

CM Zoramthanga chuan, PAHOSS thil tum a tihhlawhtlin zel theih nan leh khawpuiah hmasawnna ruhrel din tura hmalakna hrang hrangte tihlawh­tling turin sorkarin theihtawp a chhuah zel dawn thu a sawi a, "PAHOSS hi a la ṭangkai belh zel dawn a ni," a ti.

Dy CM Tawnluia chuan, PAHOSS dawng turte hripui lêng vanga la pek theih loh an awm chu pawi a tih thu sawiin, hmabak awmte zawh thuai a nih theih nan sorkarin theihtawp a chhuah zel dawn thu a sawi a; sorkar aṭangin a thlawna parking house sak ṭanpuina an dawn angin, in sakte ṭha taka enkawl zui ve turin ṭanpuina dawngtute a chah.

Sorkar thuchhuah tarlan danin, PAHOSS-in a tum ber chu, khawpui chhunga traffic jam nasa tak sutkian nana lirthei dahna tam zawk siam a ni a; mimal leh pawl, parking house sa theite hnena ṭanpuina pek a nih theih nana ruahman niin, February 6, 2019-ah Chief Minister-in a hawng. Aizawlah kalpui mek a ni a, Lunglei, Champhai leh Kolasib-ahte kalpui tura hmalak mek a ni bawk.

Parking house chu a tlem berah LMV panga emaw, two wheeler paruk emaw dah theihn a ni tur a ni a, a tam lamah bituk a awm lo. LMV pakhatah Rs 1,00,000 zel leh two wheeler parukah Rs 1,00,000 zel ṭanpuina pek theih a ni. In sak ṭanpuina sum chu thawh thuma pek chhuah ṭhin a ni a, first instalment-ah 40%, second instalment-ah leh third instalment-ah 30% ve ve a ni.

PAHOSS hnuaiah hian in sak ṭanpuina dilna 1,458 a lut tawh a, dilna 402 pawm a ni tawh. Ṭanpuina dawng kim tawh mi 11 an awm a, inhnûkdâwk mi 27 an awm thung.