MSSA-in General Conference an hmang

Mizoram Secretariat Service Association (MSSA) chuan nimin khan ATI Auditorium-ah General Conference vawi 16-na an hmang a, minister Lalchamliana'n a hmanpui.

Lalchamliana chuan, MSSA member-te chu sorkar inrêlbàwlna hrang hrang - secretariat, department leh district-ah mi pawimawh tak an nih thu a sawi a, "Sorkar file noting ziaktu pawimawh leh hotute thuràwn petu in ni a, Mizo in saka banpui dotu pawimawh tak ṭhawmmâwl in ni," a ti.

Sorkar hna chu hlawh lakna atan chauha ngai lo tura chahin Lalchamliana chuan, "In thawh chhan ber mipui tana rawngbawl a ni tih hi hre reng ang che u. Khawpui mite leh thingtlang lam aṭanga dawr tura lo kalte chu dimdâwi u la, ṭha takin lo dawngsawng ang che u," a ti a; Mizoram mipui rawngbawlsak zel tur te, sorkar finchhuah leh ṭawiawmtu an nihnate hre renga thapui thawha thawk zel turin a chah.

Minister Lalchamliana chuan, eng party pawhin sorkarna chang se, party àwn lam nei lo turin MSSA member-te a chah a; sorkar hnathawk zingah social media hmanga sorkar policy sawisel an awm ṭhin chu pawi a tih thu sawiin, conduct rules-in tih loh tur a tih zingah a telh tih hre reng a, India danpuiin Fundamental Rights a sawi zinga Freedom of Expression hman thiam a pawimawh thu a sawi bawk.

MSSA conference hi chawhmaah senior vice president Lalrinsanga, additional secretary, DPAR (GSW) & HTE-in a kaihruai a; chawhnuah technical session an neih bakah, hruaitu thar an thlang a ni.