MPCC-in Lal Thanhawla an chawimawi

Mizoram Pradesh Congress Committee (MPCC) chuan nimin khan Lal Thanhawla Auditorium-ah an party president chawl ta Dr Lal Thanhawla, Congress Working Committee (CWC) member atana ruat a nih lawmpuina leh chawimawina hun an hmang.

Inkhawm hi MPCC vice president thar tur Lal Thanzara'n a kaihruai a; Lal Thanhawla bakah MPCC president thar tur Lalsawta, general secretary C Chawngkunga leh vice president hlui H Liansailova ten thu an sawi.
Lalsawta chuan, Lal Thanhawla chu hruaitu ropui tak a nih thu sawiin, "Inthlannaa kan chak lo a nih pawhin chhuanlam a siam ngai lo a, mipui duhthlanna a zah em em a, EVM dik loh vangah a la puh ve ngai lo. Kan chak lohna hi dam takin a hoin kan pawm mai ṭhin," a ti.

Lal Thanhawla chu hlawhtlinna tam tak nei tawh, MLA certificate pawh vawi 12 dawng tawh a ni tih sawiin Lalsawta chuan, "Mizoram kohhran hrang hrangte'n kum 1994-a Gospel Cente­nary lawm an tum avangin cente­nary lawmna leh inthlan a innan buai loh nan ama term pawt tâwiin, kum 1993-ah min inthlanpui hial a ni," a ti a; Congress party-in Lal Thanhawla an nei chu an vanneih thu a sawi. (Phek 2-ah zawm a ni)

Dr Lal Thanhawla chuan, Mizorama hmasawnna lian tham zawng zawng deuh thaw siamtu chu Congress party an nia sawiin, "Mizoramin power a thar chhuah zawng zawng deuh thaw, airport, university, zirna-in pawimawh zawng zawng, medical college, kawngpui pawimawh zawng zawng leh ram dang nena insumdawn tawnna turte hi Congress party hnathawh deuh vek a ni," a ti a; Congress party mipuite chu hnual lo tur leh ṭhangthar awm zel turte tana an hnathawhte thlir chunga inchhuang hle turin a chah.

MPCC treasurer Zodintluanga Ralte chuan, Lal Thanhawla'n zahawm takin thuneihna mi dang a kian ṭhin tih sawiin, "Mizoramah remna leh muanna a thlen phah a ni," a ti a; "Mizoramin sport lama hmasawnna ropui tak tak a neih te, medical college kan neih te, power kan thar chhuah zawng zawng, hmasawnna lian tham zawng zawng hi Pu Lal Thanhawla hruaina hnuaia kan neih vek a ni," a ti bawk.

Lal Thanhawla hi kum 34 mi a nih laiin MPCC president a ni ṭan a, kum ruk chhung Hrangaia leh Lalduhoma ten president nihna an chelh tih loh chu kum 2021 thlengin MPCC president a ni a, kum 41 chhung president a ni. Kum 39 a nih lai, kum 1978-ah MLA atan thlan a ni a, vawi 12 thlan tlin a ni tawh a, ṭum nga chief minister a ni tawh bawk.