Mizoram Assembly bial tin huapin Football academy 60 din a ni dawn

State Level Monitoring Committee chuan nimin khan Sports minister Robert Romawia Royte pisaah Mizoram sorkar leh Tata Trusts-te'n foot­ball zirna 60 din chung­chang an sawiho. Football academy 60 din tur chu MLA bial 40-ah awm kim vek se an ti a, a rem leh ṭul dan azirin bial pakhatah academy pakhat aia tam hawn an rêl.

Robert Romawia Royte chuan, January 31, 2021 khan Mumbai-a World Trade Centre-ah Tata Trusts Chief Executive Officer leh hotu dangte football hmanga naupangte nun leh zirnaa puih chu Mizoram sorkar ngaih pawimawh a nih thu a hrilh tih a sawi.

SYS Minister chuan, "Mizoram tuam chhuaka football academy 60 din ka rawt a, Tata Trusts pawhin a thuphungin an remti. Covid-19 avangin a takin kan ṭan tlai ta deuh nãin, tuna bul kan ṭan thei tur hi a lawmawm tak zet. Tata Trusts lamin an sum tum tur cheng nuai 50 an ruahman tawh a, Mizoram sorkar pawhin cheng nuai 30 hû a thawh ve dawn a ni," a ti a; Mizoram sorkar inhuamna chuan funding agency dang aṭanga sum tam zawk a hnuh chhuah an beisei thu a sawi bawk.

Ṭhutkhawmah hian project kalpui dan tur te, coach lak leh training dan turte sawiho a ni a; January 2022 chhunga hawn ngei theih tura hmalak ni se, a bul ṭan nan academy 60 chu kum khat chhungin naupang kum 6-13 tan hawn ni se, an ti.

Meeting-ah hian Sports secretary H Lal­eng­mawia leh director Lalsangliana bakah, Sports Authority of India, Mizoram Football Asso­ciation leh Tata Trusts aiawhte an tel a ni.

Kum 2016 khan Mizoram sorkar hnuaia SSA leh Tata Trusts ṭang kawp chuan district parukah football zirna hi an lo kalpui tawh bawk a ni.