KHAWTHLIR
Thisen pe
Mizo National Youth Front chuan vawiina MNF Exodus Day thleng tur pualin nimin khan Mizo Hnam Runah thisen pek an huaihawt a, Aizawl Civil Hospital tan thisen unit 55 an pe a, petute mipa 48 leh hmeichhia pasarih an ni. MNYF hian September 20, 2021 khan Mizo High School-ah Martar Ni pualin thisen unit 41 an lo pe tawh bawk.
MST bus tlân dawn
Transport department chuan naktuk Zirtawpni aṭangin khaw pali-ah Mizoram State Transport (MST) bus a tlantir dawn. MST bus tlantirna turte chu Aizawl aṭangin Mímbung (Nilaini leh Inrinni), Kàwlbêm Thawhṭanni leh Ningani), Teikhang (Zirtawpni) leh Rajiv Nagar (Thawhṭanni leh Zirtawpni)-te a ni a; Aizawl aṭangin zing dar 6-ah a chhuak ṭhin ang.
Zirlai laptop pe
Aizawl North-II bialtu MLA Dr Vanlalthlana chuan December 14, Thawhlehni khan a biala zirlai tiṭha mi paruk hnenah laptop a hlan a, Ramhlun Vengthar Local Council hnenah computer a pe bawk.
CMRF for Covid-19
Nimin thleng khan Chief Minister's Relief Fund for Covid-19 ah Rs 31,36,17,544 a lut tawh a, Rs 29,70,30,470 hman tawh niin, hman loh Rs 1,65,87,074 a la awm. CMRF for Covid-19 ah hian nimin khan Mizoram Work Education Teachers Association chuan Rs 1,00,000 an chhûng lut a ni.
Lehkhabu tlangzarh
Mizoram State Planning Board vice chairman H Rammawi ziah, 'Missionary-te leh Zofate' tih lehkhabu chu nimin khan Synod Moderator kal chhuak Rev. Dr C Lalhlira'n Planning conference hall-ah a tlangzarh. Lehkhabuah hian Mizoram leh a chhehvel state-a missionary-te'n Zo hnahthlakte hnena chanchin ṭha an hrilh dan tarlan a ni.
DC-in khapna hlîp
Kolasib bawrhsap Dr H Lalthlangliana chuan Covid-19 léng avanga Lungdai khuaa zirna in, zan inkhawm leh inkhawmnaa zai phal lohna thupek a lo tihchhuah tawh chu hripui léng dinhmun a tlakhniam tawh avangin hlih a nih thu a puang.
Sial in hawng
FOCUS project first instalment hmanga AH & Vety department-in 'Mithun Shelter-Community Level and Water Supply Facility for Grazing Area’ tih hnuaia Vaphai rama sial in leh tuikhur an siam chu nimin khan FOCUS state project director RK Nithanga'n a hawng. Sial in leh tuikhurte hi Rs 3,24,190 sênga siam a ni a; Vaphaiah hian chhungkaw 20-in sial 267 an vulh mek a ni.
Cyber Jaagrookta
Nimin khan Secretariat conference hall-ah sorkar hotute'n internet kaltlanga sualna leh inbumna hrang hrang laka invenna tur inzirtirna, Cyber Jaagrookta Diwas neih dan an sawiho a, Home secretary Vanlalngaihsaka'n a kaihruai. Cyber Jaagrookta Diwas hi January 5, 2022-ah Home Minister-in a hawng dawn a ni.
Lungleiah khap
Lunglei district magistrate Kulothungan A chuan Lunglei district-ah zu, ruihhlo, hâlpuah, hâlmawi, puak thei thil, meithallàwn (sky lantern) leh naupang silai lem a mu kap chhuak theite lak luh, zawrh leh hralh khap a nih thu a puang. Khapna thupek hian thla hnih a awh dawn a, dan bawhchhiate chu IPC Section 188 hmanga hrem theih an ni.
Jubilee lawm
GM Higher Secondary School, Champhai chuan December 14, Thawhlehni khan an kum 25-na, silver jubilee an lawm a, minister of state TJ Lalnuntluanga leh Health & Family Welfare Board vice chairman Dr ZR Thiamsanga, MLA-te'n an hmanpui. GM HSS hi June 25, 1996-ah din a ni a, zirlai 730 leh zirtirtu 27 an awm mek a ni.
ZPM training
ZPM Ṭhalai Headquarters chuan nimin khan Mosia Picnic Spot-ah political training an nei a, thupui hrang hrang hmangin ZPM party hruaitu - TBC Lalvenchhunga, B Lalchhanzova leh Dr KC Lalmalsawmzauva bakah, ZPM Ṭhalai president Malsawmzuala Ralte-in thil pawimawhte an zirtir.
Zirlai chawimawi
Reiek Branch YMA hnuaia Kumpuan Sub-Committee chuan December 14, Thawhlehni zan khan Reiek Tourist Resort-ah zirlai hlawhtlingte chawimawina hun an hmang a, MNF vice president Lalthlengliana'n a hmanpui.